French Open Nomawi inchuh tur Kenin leh Swiatek

Zanin dar 6:30 aṭangin French Open 2020 hmeichhe singles final chu live ṭan a ni dawn, Paris khawpuia tennis stadium hmingthang Court Philippe Chatrier-ah Australian Open champion Sofia Kenin leh tleirawl Iga Swiatek te an inhmachhawn ang.

Ningani zan khan semifinal khelh niin, kum 19 mi Swiatek-i'n darkar khat leh minute 10 chhungin Nadia Podoroska 6-2, 6-1 in a hneh a, major tournament-ah a vawi khat nan final a lut.

Semifinal inkhel dangah kum 21 mi Kenin chuan Wimbledon title vawi hnih la tawh Petra Kvitova 6-4, 7-5 in a hneh thung a, ani hi chuan inelna lianah tawnhriat a nei a ni saltiah lo a, nomawi a chawi hial tawh.

Season hmasa khan Iga Swiatek hian mi hriat a la hlawh vak lo, tun season-ah erawh Australian Open leh US Open-ah khan fourth round leh third round a thleng a, French Open an khelh meuh chuan a thiam pahnih zingah a tel der tawh.

Poland tleirawl hian Paris khawpuiah hian match ruk a khelh tawhah set a la hloh miah lo, final thleng tura a kalkawngah hian seeded pakhatna leh clay court a inkhel thiam ni bawk Simona Halep a hneh thei hial! Tawnhriat nei tlem zawk ni mah se dah hniam theih a ni lo ang.

5 ft 9 in a sang Swiatek hi a ball vuak a na hle, a bik takin hmazawnga duh tawka a hlap chu player dangin an dawngsawng hleithei lo - seeded palina Kenin tan forehand a vuak tura ball pek loh a ngai dawn.

Poland player zingah Jadwiga Jedrzejowska chuan 1939 khan Roland Garros-ah hian pahnihna dinhmun a lo luah tawh, ani hnuah chuan Swiatek hi Poland player zingah French Open khel thei hmasa ber a ni ang.

Swiatek chuan, "Engtik niah emaw chuan Grand Slam final ka khel ve ang tihin ka ngaihtuah ṭhin, tunah chuan a tak a ni dawn ta. Final a nih vanga boruak danglam neih kher ka tum lo, round hmasa lam ang bawkin nuamti taka khelh ka duh," a ti.

Kum 21 mi chauh la ni mah se Sofia Kenin hi player puitling tak a ni tawh, ani aia tawnhriat nei ṭha leh ball vaw na zawk Kvitova lakah pawh a chiai duh lo - a dawhthei a, winners a hlap chhuah theih loh lai pawhin a khingpui tihsual hun a nghak peih.

Kenin chuan, "Thli a thawin hard court nena khaikhin chuan clay court chu a danglam hle bawk. Keimah leh keimah ka infuih a, bei hram hram turin ka rilru ka ti paukhauh," tiin Kvitova a hneh dan chanchin a sawi a, final-ah pawh a rilru a paukhauh dawn.

American star hian French Open bikah hian sulhnu ṭha a la nei bik lo, amaherawhchu junior huang aṭanga a rualpui zinga ṭha bik a nih theih avangin eng inelnaah pawh player hlauhawm a ni thei tih erawh a chiang viau.

Kenin leh Iga Swiatek te hi senior huangah chuan an intawn vawi khatna a ni dawn, junior huangah erawh Roland Garros 2016 khan an lo intawng tawh; Swiatek zawkin 6-4, 7-5 in hnehna a chang, chak tur zawk rinthiam a har viau.

Final thlir lawkin Kenin chuan, "Tu zawk zawk pawh chak thei kan ni a, nomawi chawi tur chuan vanneihna a ngai tel tih ka hria. Chutih rualin final thleng tur hian vanneih chauh a tawk lo a, khelh ṭhat a ngai ve bawk. Swiatek khelh dan zir chungin ka fimkhur viau ang," a ti.

Nizan khan French Open mipa singles semifinal khelh a ni a, champion lai Rafael Nadal leh Diego Schwartzman an inhmachhawn a, semifinal lehlamah world number 1 Novak Djokovic leh Stefanos Tsitsipas te an inhmachhawn bawk.

Semifinal result kan hre hman lo a, Pathianni zanah final khelh zui leh nghal tur a ni ang. Serbian star Djokovic hi kumina khel ṭha tluang ber a ni a, French Open-ah erawh vawi 12 champion tawh Nadal chu rinkai ber a ni thung.

Schwartzman leh Tsitsipas te hi theihna nei sang, mahse Garnd Slam nomawi la chawi lo an ni. An khelh fuh ni chuan player ṭha leh chungnung zawka ngaihte pawh hneh turin theihna an nei sang ve tawk.