Bryant hriatreng nan Lakers

Tukin dar 6:30 hian NBA Finals game 5 khelh a ni dawn a, champion thei dinhmuna ding Los Angeles Lakers chuan an legend Kobe Bryant hriatreng nan "Black Mamba" tih chuanna jersey an ha dawn.

Lakers hian best-of seven series-ah 3-1 in hma an hruai mek, an chak a nih chuan nomawi an chawi nghal ang. Miami Heat lamin hnehna an chang ve leh a nih erawh chuan October 12, Thawhṭanni zingah game 6 an khel leh thung ang.

January thla khan helicopter chesualah Bryant leh a fanu Gianna bakah midang pasarih an thi a, an thiampuipa ni ṭhin Bryant awm loh kumah nomawi an chawi duhna a zual a, title an la a nih pawhin Bryant tan an hlan dawn tih a hriat.

Lakers-in NBA title an lak hnuhnung ber chu season 10 liamta daih tawh kha a ni a, chutih laia Lakers champion puitu chu Bryant a ni. Kuminah hian LeBron James leh Anthony Davis hoin champion theih an inbeisei.