Argentina chakna Lionel Messi

Lionel Messi-a goal khat hmangin Argentina chuan Ecuador 1-0 in an hneh a, South America aṭanga World Cup khel tur zawnna a an match hmasa berah point thum an hlawh chhuak nghal.

Nimin zing La Bombonera-a inkhelah Argentina lamin minute 13-na lekah penalty an hmu a, captain Messi chuan goal-ah chantirin an ram chu hma a hruai pui a, inkhel tawp thlengin goal dang a lut zui tawh lo.

South American (CONMEBOL) aṭang hian ram 10 ten World Cup qualifier hi an khel a, vawi hnih ṭheuh an inkhelh kual hnua a sang pali chu Qatar-ah an kal ang, pangana chuan playoff an khel thung dawn a ni.

Ram tana goal 71 khung tawhtu Messi chuan, "Qualifier match zawng zawng a hautak leh dawn, match hmasa bera hnehna chan theih hi a pawimawh hle a ni," a ti. Argentina hian 1993 Copa America hnuah nomawi lian an la chawi leh lo.

Nimin zing inkhel dangah Uruguay chuan Chile 2-1 in an hneh. World Cup champion hmasa ber tan Luis Suarez goal khung chu Alexis Sanchez-a'n sut mah se Gomez Gonzalez chuan hun tawp hma chiahin chakna goal a khung.

Argentina hian October 13, Thawhlehni zan dar 1:30-ah Bolivia an lenchilh leh ang.