Chelsea leh Pochettino an inṭhen - inhuatna a awm lo

Mauricio Pochettino-a'n Chelsea-ah team din a tum thu sawi fo mah se, a beisei ang team a din hman dawn ta lo. May 21, Thawhlehni zan khan Poch leh Chelsea ten inhriatthiam tawnnaa an inṭhen thu an sawi a, season tharah Poch-a'n Blues a enkawl tawh dawn lo.

Kum 52 mi Poch hian July 1 khan Chelsea hi a zawm a, kum hnih daih contract a ziak a, a ṭul dan a zira thla 12 dang pawhsei theih tura ruahmanna siam a ni. Mahse, a contract an pawtsei lo mai pawh a ni lo a, kum khat hnuah a chhuak dawn.

Argentine coach chuan, "Chelsea neitu te leh Sporting Director te chungah Chelsea enkawlna hun duhawm tak min pek avangin lawmthu ka sawi a, tunah chuan Premier League leh Europe-a inelna tak tak hmachhawn turin Chelsea hi a inpeih tawh a ni," a ti a, hna a thawk ṭha thawkhatah a ngai.

Chelsea hian Premier League table-ah parukna ni chungin season an khar a, League Cup-ah final lutin Liverpool an ngam lo a, FA Cup-ah semifinal an lut bawk. Blues sporting director pahnih Laurence Stewart leh Paul Winstanley te chuan, "Chelsea aiawhin Mauricio hi lawmthu kan hrilh a, a tan Stamford Bridge-ah hmun a awm reng ang - a hma hun atan duhsakna sang ber kan hlan e," an ti.

A tirin...

May 2022-a Todd Boehly leh a thawhpuiten Chelsea an lei khan fans tam takin beisei dan neih thiam an harsat. American sumdawng hausa hian tum sang tak an nei tih pholan nan transfer-ah sum a hmang nasa a, Chelsea an lei hnuah player lei nan pound tluklehdingawn khat chuang an seng tawh!

Chelsea neitu an nih aṭanga rei lotêah Thomas Tuchel an ban a, a aiawh tura an lakluh Grahan Potter pawh rei an kawl chuang lo. Season liam ta ṭan dawnah Poch an thlem lut a, Argentine coach hnuaiah pawh an bazar nasa hle.

Blues hian Poch-a hoin player lakluh nan pound maktaduai 400 chuang an seng zui a, kum 25 hnuai lam player an la lut tlangpui - an lakluh zingah Cole Palmer, Nicolas Jackson, Moises Caicedo leh Christopher Nkunku te ho an tel a, bazar ṭha an inti hle.

Mahse, Chelsea hian senior player rual an chhuahtir ve ṭeuh tho a, anni ho hralhna aṭang hian £250mtd vel an la lut. Player naupang rual hmanga team din tur erawhin hun a duh a, tawnhriat nei an tam miau loh avangin a harsa.

Barakhaih

Poch pawhin beisei angin Chelsea-ah hun a hmang lo a, season laihawl lai vel kha chuan Argentine coach hi an ban mai rinna a lian hman tawh hle. Mahse, player an lei hnem miau avangin team din a har ang tih a chiang a, hun a duh deuh a nih pawhin a demawm lo.

Season tawp a hnaih meuh chuan Poch-a'n team din a tum dan ruangam a lang ṭan a, an league match hnuhnung pangaah hnehna an chang vek a, Newcastle United leh Manchester United tlanpelin league-ah parukna an ni.

Blues hian palina Aston Villa pawh point nga chiahin an phak lo a, League Cup final leh FA Cup semifinal an thlen bawk avangin fans tam takin Poch an ngaina ṭan a, Argentine coach hi cham turin an duh.

Hetiang boruak karah hian December velah chuan ban a nih ngei tawh rinawm hman Poch hi cham tura ngaih a ni. Mahse, Thawhlehni zanah Chelsea-in rin loh takin chanchin an nei a, chu chu Poch nena an inṭhen thu a ni.

A tawk ta e...

Kar hmasa Zirtawpni khan Chelsea chairman Boehly leh Poch te inhmuin an titi a, Boehly hian fan-te chu dawhthei taka result ṭha an neih hun tur chu nghak turin a lo ngen fo tawh - ani hi chuan Poch chelh hi a hnial hran lo niin an sawi.

Hetihlai hian club neitu zinga mi Behdad Eghbali chu lang lo phena thutlukna pawimawh siam ṭhin nia sawi a ni a, ani pawh hi kar hmasa Inrinni khan Clearlake Capital a dinpui Jose Feliciano nen London khawpuiah an awm tawh.

Thawhṭanni khan Poch hi Chelsea Cobham training ground-ah koh a ni a, club sporting director pahnih Paul Winstanley leh Laurence Stewart te nen an inhmu a, Behdad Eghbali nen an inbe bawk.

Rei tawk fang an inkawm hnuah thutlukna an la siam thei lo a, Thawhlehnia titi ho leh turin an inṭhen. Mahse, Thawhlehni a lo thleng a, anni lam sanaa zing dar 11:30, keini lamah chuan zan dar 9:00 velah khan inṭhen mai turin thutlukna an siam.

A chhan bulpui

Poch leh Chelsea te hi inrem takin an inṭhen a, lungawi lohna a awm lo. Chutihrual chuan ngaihdan inhmuh lohna an nei - hei vang hian an inrem thei lo a, a tawpah chuan inṭhen mai hi a fuh zawkin an hria.

Khawthlang media ṭhenkhatin an tarlan dan chuan player hralh leh leiah inrem lohna a awm lo. Mahse, Chelsea neitu lam hian set-piece department thar din an duh a, hei hi Poch chuan a hrethiam lo.

Argentine coach hian, "Chutiang ti tur chuan alawm coach kan nih! Specialist dang kan mamawh lo," tiin a sawi a, a game ruahmannaa midang an inrawlh a duh lo. Mahse, Chelsea neitu lam hian hei hi neih an duh tlat si a, inṭhen a ngaih phah.

Hetihlai hian ṭhenkhat chuan Poch hian club kalphung chu hahthlak a ti a, chhuahsan a châk tawh hrim hrim niin an sawi. Connor Gallagher emaw Trevoh Chalobah chhuahtir tumna awm chu a pawm lo niin an sawi bawk - chiang taka sawi theih erawh a awm lo.

Rintawk lohna!

June 15, 2025 hian Club World Cup khelh a ni dawn a, hetah hian Chelsea an inlan dawn - he hun a thlen hian Poch-a contract a zo tawh dawn a, CWC nen inhnaih lutuka coach dang zawn leh vel hi an tan a buaithlak dawn.

Chelsea thuneitute hian Poch-a'n season tharah beisei phak lo ta se, season laihawla inban a, team din tura hmalak leh chu hautak an ti, niin an sawi bawk - a tawpah chuan inṭhen mai chu a chinfelna niin an hria.

A tawi zawnga sawi chuan Chelsea thuneitute hian 100% in Poch an la ring tawk lo a, hetiang hnuaia awm hi Poch-a'n a duh bik lo. Chu mai piah lamah coach hna ruak tam lai tak a ni a, Poch hian chhuah mai a pawi ti lo ve hrim hrim bawk.

Argentine coach hi Bayern Munich, Juventus leh Manchester United te nen sawizawm an ni nghal a, Tottenham Hotspur boss hlui hi season tawp lamah a lo che ṭha bawk nen, hna a van lutuk lo tura ngaih a ni.

Poch-a hmun ruak

Chelsea-in Poch-a hmun ruak luah tur coach an zawn nghal a ṭul a, tun hnaiah Jose Mourinho hming lam rik fo ni mah se, Portuguese coach laklet tumna a awm lo a, Bayern chhuahsan tur Thomas Tuchel lam pawh an hawi lo.

Blues hian coach naupang leh viak ṭha tak, an club kalphung mila kal thei tur an duh nia sawi a ni a, a tawi zawnga sawi chuan coach ṭha ve tak, mahse, an thuawih thei tur an duh a ni ber!

Manchester City-a Pep Guardiola assistant ni ṭhin, tuna Leicester City manager Enzo Maresca hming pawh a tirah sawi tel ni mah se, Chelsea hian Maresca hi an awt lo - Ipswich Town manager Kieran McKenna, Sporting Lisbon boss Ruben Amorim leh Burnley coach Vincent Kompany hming a ri ring hle.

Brighton & Hove Albion boss hlui Roberto de Zerbi pawh sawi rik a ni a, ani hian season tawp rualin Brighton hi a chhuahsan. Mahse, Blues hian Brighton coach Graham Potter an lo la tawh a, an zawng chhang lo mai thei!