MPL10 U17-ah Aizawl FC an champion

Mizoram Premier League Under 17 final-ah Chanmari FC leh Aizawl FC te hun pangngaiah 2-2 in an inhnehtawk a, extra time-ah goal khat ve ve khung lehin minute 120 chhungin 3-3 a ni. Penalty shootout-ah Aizawl FC an vannei ta zawk a, Victor Lalbiakmawia enkawl team hi 2-1 in an vannei ta zawk.

1st Bn MAP Ground-a inkhelah Rochhingpuia enkawl Chanmari FC ṭum thum hma an hruai a, mahse Aizawl FC-in an sut zel. Penalty shootout-ah goalkeeper an langsar a, Gabriel VL Ruatfela chet ṭhat zarah Aizawl FC an champion.

Goal khat ve ve

League round-a pakhatna Chanmari FC-in bul an ṭan ṭha a, inkhel pawh an thunun zawk. Minute 19-naah best player-a thlan Lalrinfela Ralte-in mual lai aṭanga Solomon-a hnen aṭanga a ball hmuh chu lalutin, angle zim deuh mah se 'cool' takin goal-ah a chantir.

Chanmari an che ṭha zel a, Fela ball pek um luttu Dinsanga'n goalkeeper chauh a hmachhawn hnuah goal ban a pet per. First half tawp lamah Aizawl FC an insiam rem a, Vanneihtluanga box pawn aṭanga a 'risk' chu goal-ah a lut teuh hle.

AFC forward Christopher Zaithantluanga'n goalkeeper tauh khalh mah se goal zawnah a tauh lo. Minute 45-naah Aizawl FC hun a thleng a, midfield aṭanga penetration pass ṭha chu Chris-a'n um lutin CFC keeper Tluang Tluanga kap karah a khung.

An inhnehtawk

Second half-ah pawh team pahnih an intluk tawk a, chance ṭha an neih chhawk. Rohlua'n CFC tan chance ṭha a hlah a, AFC defender-in an lama a pet per palh pawh keeper Gabriel-a'n a dang ṭha hle.

AFC midfielder Vanneihtluanga'n box pawn aṭangin risk a la leh a, Chanmari keeper Tluang Tluanga'n a dansak ṭha hle. Minute 90-ah pawh 1-1 a ni a, injury time-ah goal a lut thung.

Injury time minute thumnaah dinglam aṭanga Dinsanga cross chu Imanuel Lalrohlua'n ṭha zetin a khung a, Chanmariin 2-1 in hma an hruai. Rochhingpuia hote chak turah inngai mah se Victor Lalbiakmawia hote an la beidawng lo.

Minute ruk hun pek belh a ni a, minute sarihnaah Aizawl FC captain C. Lallawmawma'n (C. Mama) freekick aṭangin mawi zetin a khung. Chutihrualin Chanmari keeper Tluang Tluanga'n a hna a thawk tawk lo.

Own goal pahnih

Extra time-ah team pahnih an chau deuh tawh niin a lang a, inkhel erawh an inhnehtawk chhunzawm zel a, a hma angin nung tawh lo mah se a hmuhnawm zel bawk.

Minute 102-naah Chanmari defender Dika'n halfway line thlen hma aṭangin ball a vawrhlut a, Aizawl FC defender Moses Lallawmkima'n pha leh pha loa tauh chhuah tumin an lamah a tauh lut.

Chanmariin a vawi thum nan hma an hruai a, mahse minute 105-naah dinglam aṭanga ball vawrh luh chu Chanmari defender Lalrempuia'n ball chhut sualin an lamah su lut. Extra time second half-ah inkhel hmuhnawm chhunzawm mah se goal a luh belh tawh lo.

Pet goal a harsa!

Penalty Shootout-ah pawh team pahnih an intluk tawk hle. Chanmari tana pet hmasa ber Solomon-a pet chu AFC keeper Gabriel-a'n a dansak. Mahse, AFC tana pettu Christopher-a'n crossbar a pet per a, a goal lo.

Penalty-ah chuan goal a tam ṭhin a, nimin inkhelah chuan goal lo a tam zawk. Vawi nga ve ve an pet zawhah Chanmari tan Dinsanga chauhin a khung a, AFC keeper Garbiel-a an ngam lo.

Chanmari keeper Tluang Tluanga che ṭha tho mah se dan vek sen a ni lo. Aizawl FC tan Rothangpuia leh Lalthanpuia ten khungin penalty shootout-ah 2-1 in hnehna an chang.