Premier League coach ṭha ber Pep

Manchester City boss Pep Guardiola chu Premier League manager of the season atan thlan a ni a, kum 53 mi coach hian he dinhmun luah tur hian Arsenal coach Mikel Arteta, Aston Villa manager Unai Emery, Liverpool boss chhuak ta Jurgen Klopp leh Bournemouth boss Andoni Iraola te a khum.

Spanish coach Pep hian a zawna a vawi li nan City chu Premier League-ah a champion pui a, English club zinga a zawna league nomawi vawi li chawi thei hmasa ber an ni - he chawimawina dawn hi a phu hle.

Pep chuan, "He award hi keimah chauha dawn ka duh bik lo a, hnathawk ṭha tak tak an awm ve ṭeuh a ni. A bik takin Mikel hming ka lam duh a, match tawp ber ni thlengin kan theihtawp chhuah lo thei loin min nawr kal.

"Jurgen pawh sawi loh theih a ni lo a, kum tam tak chhung inelna hautak kan lo hmachhawn dun tawh ṭhin. Unai Emery pawh sawi a ngai - thil theih loha kan ngaih tiin, Aston Villa chu Champions League a hruai kai thei.

"Andoni Iraola hian Bournemouth enkawlin, Premier League-a a season hmasa ber a hmachhawn a, harsa takin season bul ṭan mah se, ropui takin an lo 'comeback' leh thei a ni," a ti a, a khum tak coach-te a fak.

Arteta enkawl Arsenal hian point 89 hmuin Premier League-ah pahnihna an ni a, Klopp-a enkawl Liverpool chu pathumna an ni. Emery-a'n a vawi khat nan Aston Villa chu Champions League a hruai thleng a, Cherries-in 12-na niin season an khar.

Hetihlai hian Liverpool hmeichhe team coach Matt Beard chu Women's Super League manager of the season atan thlan a ni a, kum 46 mi Beard hian Liverpool chu WSL-ah palina nihpuiin, kum 2014-a an champion hnua league-a an thlen san ber ṭum a ni.