PVL semifinal khel tur a hriat kim : Hunthar, Tuichangral, TNT leh Chhinga Veng an tlang

Ather Pro Volleyball League 2024 league round an khel zo a, chak kim Hunthar bakah Tuichangral, Thutak Nunpuitu Team (TNT) leh Chhinga Veng Spikers te semifinal an lut. Durtlang North leh Hlimen te erawh an inhlangkai zo ve ta lo.

Thawhlehni zan khan LPS Arena, Falkland-ah league match hnuhnung ber khelh niin, tlang chiang tawh Hunthar chuan Durtlang North chu 25-21, 25-22, 24-26, 26-24 (3-1) in an hneh a, a chung berah an awmna an sawhnghet.

Durtlang North hian semifinal lut turin point hnih tal an mamawh, a tlem berah set hnih tal an lak a ngai tihna a ni. Set khat chauh an lak theih avangin an tan kawng a phui a, an elpui Chhinga Veng Spikers an tlang phah ta zawk a ni.

Pakhatna ni chiang sa tawh Huntharin set hmasa pahnih an la zawn nghal a, a kaw tawpah Durtlang North-in player tawnhriat nei tlem zawk luhtirin an bei let. Alex Remruatkima leh Vanlalthuama'n team fuih phurin vawi khat an deuce hnuah set thumna an la.

Set linaah Thuama'n hui tlain 24-21-in an sang a, point khat hmuh belha semifinal lut turin hun tha vawi thum an nei zawn. An dinhmun nghaktu Chhinga Veng tan beisei a bo hman a, mahse, Huntharin dang betin point nga an hmu zawn a, uiawm takin Durtlang North an tla.

Vawi nga an khelhah Hunthar chak vekin a ṭum khat nan set an hloh ve thung a, semifinal-ah Chhinga Veng nen an inkhel ang. Durtlang North-in point nga thawk chhuakin panganaah an awm a, set hnih la se point ruk hmuin Chhinga Veng an nih rual ang a, set an lak leh hloh dan atangin an sang zawk dawn a ni.

A vawi thum nan champion thei turin Huntharin league an thunun hneh hle a, Durtlang North hmaah Fabian Lallunghnema'n vawi 23 vaw tlain point kua a hloh a, a vawi khat nan Kuriz Player of the Match-a thlan a ni a, a kawppui Anurag Rawat chuan point 29 hmuin 17 a hloh.

Hun pawimawhah Durtlang North player langsar an che tha lo a, Johan Vanneihsanga'n ṭum 11 hlap tlain point kua a hloh a, Shashank Kandpal chuan point nga hmuin tum li a tisual a, Thangminlal Guite chuan point li a hlawh aia tam point nga a paih thung a ni.