Pakhatna KKR-in final an lut

Indian Premier League-ah Kolkata Knight Riders chu league round-ah pakhatna an ni a, qualifier 1-ah pawh a chungnungna a lang. May 21, Thawhlehni zan khan KKR hian Sunrisers Hyderabad chu wicket riatin an hneh a, final an lut.

Sunrisers erawh chak lo mah se qualifier 1 an khelh phak avangin final luh theihna kawng a la inhawng. May 24, Zirtawpni zan hian qualifier 2-a Rajasthan Royals leh Royal Challengers Bengaluru inkhela chak zawk nen an inhmachhawn leh ang.

KKR bowler an che ṭha

Narendra Modi Stadium-ah qualifier 1 khelh a ni a, ṭhumvawrah Sunrisers an vannei a, vuak hmasak an thlang. Mitchell Starc-a'n a ball vawi hnih vawmnaah wicket a vawm thlu nghal a, run siam loin Travis Head pavillion-ah a siamtir.

Sunrisers-in over hnihnaah Abhishek Sharma an chan leh a, over nganaah Starc-a'n Nitish Kumar Reddy leh Shahbaz Ahmed te a zawn zatin a vawm hlum leh bawk.

Entu mipuiin wicket ringawt an hmu lo a, Rahul Tripathi-a'n Sunrisers beiseina a rawn siam. Kum 33 mi Tripathi nena inkawp fuh Heinrich Klaasen-a'n ball 21 lekah 32 runs a siam mah se risk a la sual a, a ball vuak an mansak.

Sunrisers run rate a ṭha chho a, target ṭha tak an siam turah a ngaih theih. Mahse, over 13.2-naah 121 runs siam tawh mah se a che ṭha ber Tripathi chu 55 runs a siam tihin a run out. Sanvir a rawn lut a, ball vawi khat a hmachhawnnaah a thi nghal.

Tailender lam an che chhe zui a, captain Pat Cummins-a'n 30 runs a siam zarah 159 runs an siam a, target ṭha an chhawp chhuak lo. Over 20 pawh an dam tluan thei lo a, 19.3 overs-ah an thi vek.

Iyer Show

Kolkata Knight Riders erawhin bul an ṭan ṭha. Rahmanullah Gurbaz (23) leh Sunil Narine (21) ten bul an ṭan chhe lo a, wicket hmasa ber an hloh hian over 3.2-na chauh la ni mah se 44 runs an siam tling tawh. Narine-a thih hian over 6.2-na a ni a, 67 runs an siam tawh bawk.

Venkatesh Iyer leh Shreyas Iyer te an rawn inlar a, Sunrisers tan chak beisei ngam chi pawh a ni ta lo. Venkatesh-a'n ball 28 lekah 51 runs a siam. Shreyas a la che ṭha lehzual, ball 24 lekah 58 runs a siam. Over 13.4 runs-ah 164/2 runs siamin KKR-in hnehna an chang a, final an lut.

KKR hi IPL-ah vawi hnih an champion tawh a, chutihrualin kum 2014 hnuah nomawi an chawi tawh lo.