Luangmual hmaah Bungkawn

Zanin dar 8:00 hian Ather Pro Volleyball League hmeichhe semifinal khelh a ni dawn, champion lai Luangmual leh Bungkawn te an intawng dawn a ni.

A hmuna inkhel en tur tan LPS Arena, Falkland Park pan mai tur a ni a, mahni in aṭanga en duh tak LPS-ah live a ni a, man chawiin YouTube lamah en theihin a awm bawk.

League round-ah Luangmual an che ṭha a, harsa lo takin an tlang - vawi khat an chetsual ve zauhna chu Serkawn lakah a ni a, buaina lian erawh a tling phak lo, zanina an khingpui tur Bungkawn ngei pawh hi 4-1 in an lo hneh tawh a ni.

Champion lai an ni a, an player pawimawh spiker Lalramliani, Lalbiakngheti leh Remlalnghaki te an nei a, anni hi an chakna hnar pawimawh an ni ṭhin. Bungkawn tan final lut tur thu thih tha a beih a ngai tihna a ni a, inkhel a hmuhnawm khawp ang.