Kroos ngainatu an ṭhahnem

Real Madrid-in May 25, Inrinni zan dar 12:30-ah Real Betis an mikhual dawn a, tun season atana Los Blancos league match hnuhnung ber hi Toni Kroos-a'n Santiago Bernabeu-a player nichunga a inlan hnuhnun ber a ni ang.

Ticket hi Real Madrid-in hun rei lote chhungin an hralh zo a, ticket lei tumin fan ṭhenkhat chu darkar nga chuang an intlar hial.

Kroos hi kum 34 mi chauh a ni a, Euro 2024 zawhah inkhelh a chawlhsan tur thu a tichiang. Theihna sang tak a neih avangin la chawl lo se, titu pawh an ṭhahnem hle.

Tun season-a Real Madrid-in La Liga nomawi an chawi theihna turah pawh player pawimawh a ni a, Champions League final an thlenna kawngah pawh a ṭangkai. Europe league sang pasarih midfielder zingah pass accuracy a sang ber a, hma zawnga pass leh hnai tea ball in pekah (short pass) pawh a ball pek a accuracy a sang ber.

German midfielder Kroos hi Germany tan pawh vawi 109 a inlan tawh a, World Cup a champion tawh bakah Bayern Munich leh Real Madrid tan nomawi ṭhahnem tak a chawi. A naupan lai aṭangin Kroos hian record a nei ṭha a, Euro U17 C'ship (2006) leh FIFA U17 World Cup (2007)-ah golden ball a dawng ve ve a, hei hian theihna a neihsan zia a sawifiah.