LMA award Guardiola leh Arteta te tluk loh McKenna

Pep Guardiola-a'n Premier League-ah a zawn zatin Manchester City vawi li a champion pui a, Mikel Arteta-a'n Arsenal din tharin champion beisei ngamin pahnihnaah niin season tawp an khar. Mahse, League Managers Association-in manager of the year atana thlan chu Guardiola emaw Arteta emaw ni loin Ipswich Town manager Kieran McKenna an thlang.

LMA-in thlan theih tura a chhawpchhuah zingah Guardiola leh Arteta bakah Everton manager Sean Dyche, Aston Villa manager Unai Emery leh Portsmouth boss John Mousinho te an tel bawk. Chutihrualin Premier League manager of the season-ah Pep Guardiola thlan a ni a, Women's Super League manager of the season-ah Liverpool manager Matt Beard thlan a ni bawk.

Tu nge McKenna?

McKenna hi London-a piang a ni a, Northern Ireland-a seilian a ni thung. Ole Gunnar Solskjaer hnuaiah khan Man United enkawltu zingah an tel a, Norwegian manager chhuah rual khan Old Trafford an chhuahsan.

Kum 38 mi McKenna hian footballer ni turin theihna a nei a, Tottenham Hotspur academy-ah a inzir ṭhin. Northern Ireland atan pawh Under 19 leh Under 21-ah an inlan pha a, mah se kum 22 mi lek a nih laiin hliam vangin inkhelh a chawlhsan a, Spurs senior team-ah pawh a inlan hman lo.

McKenna hian Loughborough University aṭangin sports science-ah degree a nei a, lehkha zir lai pawhin football coaching a kalpui reng tho. Tottenham Hotspur, Leicester City, Nottingham Forest leh Canadian club Vancouver Whitecaps-ah youth coach hna a chelh.

Sports science degree a neih hnuah Tottenham-ah Head of Academy Performance Analysis hna a thawk. Spurs academy-a a awm lai hian Liverpool pawhin academy-a coach ni turin an sawm. McKenna hian Spurs Under 18 team hi FA Youth Cup-ah kum 2015 khan semifinal a thlenpui bawk.

August 2016 khan Man United Under 18 manager ni turin Spurs a chhuahsan a, season hnihnaah Man United chu Premier League Northern Division a lakpui. Jose Mourinho-a'n Man United a enkawl lai khan Michael Carrick nen first team coaching staff-a tel turin an kaisang.

Kum 2018-19 season-ah hian Man United an chet ṭhat loha vangin December 18, 2018 khan Mourinho an ban a, a thlaktu Ole Gunnar Solskaer-a'n Carrick leh McKenna te hi a la chelh zel. November 2021-a Ralf Rangnick-a'n Solskjaer a thlak pawh khan McKenna hian a hna hi a chhunzawm zel.

Hming a chher ta

Mahse, December 16, 2021 kha chona thar hmachhawnin McKenna hian Ipswich Town a zawm a, kum thum leh a chanve contract a ziak. Hetihlai hian Ipswich hi League One-ah an awm. McKenna hnuaiah Ipswich hi pahnihna an ni a, Championship khel turin an inpettling.

League One-ah hian McKenna enkawl Ipswich hian hneh loh nei loin match 19 an kal tluang a, McKenna pawh ṭum hnih ngawt manager of the month-a thlan a ni. Championship-ah pawh McKenna hi bul an ṭan ṭha nghal a, match ngaah vawi li chakin vawi khat an inhnehtawk a, nikum September khan manager of the month-ah an thlang.

Kumin March-ah pawh match ngaah vawi li chakin McKenna hi manager of the month a ni leh a, Ipswich-in Championship an vawi khat khehnaah point 96 hmuin pahnihna an ni a, champion Leicester City an phak lohna chu point khat chauh a ni.

An chawimawi e

McKenna-a'n Ipswich a enkawl tirhin League One an khel a, season tharah erawh Premier League an khel tawh dawn. Season hnih chhunga McKenna hnathawh hi hmuh hmaih a thiang lo a, LMA manager of the year dawn pawh hi a phu.

Manchester United manager hlui Sir Alex Ferguson chuan McKenna hnenah chawimawina hi a hlan. McKenna chuan, "He chawimawina hi ka hun tawha ropui leh ka chhuan ber a ni," tiin a sawi.

Ipswich manager McKenna chuan sawi chhunzawmin, "First team ka enkawlna kawnga ka hun tawn hi a lawmawm hle. Chutihrualin Premier League manager ni a, manager ropui tak tak hmachhawn hun hi ka ngakhlel lehzual," tiin a sawi.

McKenna hi Premier League manager a ni dawn tih chu a chiang a, mahse a kaipui ber Ipswich hi a enkawl kher ang em tih chiang ta lo. Season hnih chhung leka record ṭha tak a neih avangin McKenna hian club lian zawk aṭangin zawmtu a nei a, thutlukna a la tichiang lo thung.