Rashford leh Henderson tel lohna England

Premier League neitu an ni bawk a England hian ngaihven a hlawh ṭhin - Euro 2024 khel tur squad an puang a, koh loh langsar zingah Marcus Rashford leh Jordan Henderson te hming a lang.

Manchester United forward Rashford hian season a hmang ṭha lo, league match 33 khelin goal sarih a khung bakah a ṭhiante khung tur vawi hnih a siamak a, coach Gareth Southgate-a'n a koh loh chhan chu amah aia season hmang ṭha an awm vang niin a sawi.

Rashford leh Henderson chungchang sawiin Southgate chuan, "A chang chuan thutlukna harsa tak siam a ngai ṭhin. Hun rei tak kan lo thawhpui tawh, sulhnu tam tak kan neihpui tawhte nena kan thil tih a tawp a ngaih chang a awm ṭhin.

"Marcus chungchang kan sawi a nih chuan, a khelhna hmun anga khel ṭhin midangin season an hmang ṭha zawk a, thil danglam leh mak a ni hran lo," a ti a, ram tana inlan chungchangah a tan kawng a inkhar tihna a ni lem lo tih a sawi bawk.

Henderson-a koh loh chhan sawi zuiin, "Three Lions camp a zawm hnuhnung ber kha a inhliam a, a hnuah chawlhkar nga chhung inkhel thei loin a awm zui bawk. Mihring ṭha leh ṭhiante ho khawm thiam a ni a, a tel thei lo tur hi kan ngai dawn hle a ni," a ti.

England hian player 33 an ko phawt a, inelna Germany pan turin an zavaia hruai theih an ni dawn lo; player 26 chauh hruai theih a nih avangin a tlem berah mi pasarih chu an la paih leh ang.

Southgate tan chanchin lawmawm lam a awm ve tho. Captain Harry Kane hi a hnungzâng hliam a dam tawh a, ram tana inelna lian hmachhawn thei turin a inpeih tawk tawh hle, a hliam vang hian Bundesliga match hnuhnung pahnih a khel thei lo.

Kum 30 mi Kane chungchang sawiin Southgate chuan, "Hnungzâng lam na hi chu chhan hrang hrang vangin a thleng thei, league match ṭhenkhat a khelh theih loh phah kha pawi ka ti a, chutihrualin tunah chuan a dinhmun a ṭha," a ti.

Nipui bazar hmasa khan Kane hian Tottenham aṭangin Bayern Munich a zawm - Bavarians tan hian a season hmasa berah, inelna hrang hranga match 45 a khelh aṭangin goal 44 a khung, mimalin cheṭha viau mah se nomawi erawh a chawipui rih lo.

Southgate chuan, "Kane tan season ṭha a nih rualin hmabak a la nei a, chona a hmachawn hmasak tur chu England tan a ni dawn, nomawi chawi chak a tuihalna hi keini lamain kan chhawr ṭangkai ngei ang," tiin a sawi.

Three Lions tana koh zingah Luke Shaw hming a lang a, manager Southgate chuan English player zingah left back an tam lo tih a sawi a, chuvangin atan duhthlan tur an tam lohna hmun niin a sawi bawk.

Southgate hian Declan Rice aiawh thei tur an nei mumal lo tih a sawi bawk a, chuvangin Arsenal midfielder Rice hian Euro 2024 an khelh hunah England tan midfield laia hmun pawimawh a chang dawn, a chungah mawhphurhna a lian ang.

England squad:

Goalkeepers: Dean Henderson (Crystal Palace), Jordan Pickford (Everton), Aaron Ramsdale (Arsenal), James Trafford (Burnley).

Defenders: Jarrad Branthwaite (Everton), Lewis Dunk (Brighton), Joe Gomez (Liverpool), Marc Guehi (Crystal Palace), Ezri Konsa (Aston Villa), Harry Maguire (Manchester United), Jarell Quansah (Liverpool), Luke Shaw (Manchester United), John Stones (Manchester City), Kieran Trippier (Newcastle), Kyle Walker (Manchester City)

Midfielders: Trent Alexander-Arnold (Liverpool), Conor Gallagher (Chelsea), Curtis Jones (Liverpool), Kobbie Mainoo (Manchester United), Declan Rice (Arsenal), Adam Wharton (Crystal Palace).

Forwards: Jude Bellingham (Real Madrid), Jarrod Bowen (West Ham), Eberechi Eze (Crystal Palace), Phil Foden (Manchester City), Jack Grealish (Manchester City), Anthony Gordon (Newcastle), Harry Kane (Bayern Munich), James Maddison (Tottenham), Cole Palmer (Chelsea), Bukayo Saka (Arsenal), Ivan Toney (Brentford), Ollie Watkins (Aston Villa).