Goal khung sim thei lo Calvert-Lewin

Everton tan tun season match ruk a khelha goal kua khung tawhtu Dominic Calvert-Lewin-a'n England jersey ha chunga a match hmasa berah pawh goal a khung nghal a, friendly match-ah an ṭhenawm ram Wales chu 3-0 in an hneh. 

Kum 23 mi Calvert-Lewin hi tun hmain Three Lions squad-ah koh a la ni ngai lo a, thil awm lo a ni hran lo - mahse, England tana koh a nih hmasak berah bul ṭantir nghal a ni a, minute 26-naah goal hmahruai a khung. 

Wolverhampton Wanderers captain Conor Coady-a'n a career a a theihnghilh tawh ngai loh tur hun a tawng bawk a, April 2018 a Wolves tan goal a khung hnua a vawi khat nan goal a khung ve leh ta - England tan match hnih a khelh vena chauh a ni!

Coady goal khung hnuah Danny Ings inlar hun a thleng a, Southampton striker hian 'overhead kick' hmangin mawi zetin an goal thumna a khung - season hmasa duhawm taka hmangtu hian 'one season wonder' mai a ni dawn lo tih a pholan chhunzawm zel. 

England tan Jack Grealish chu player langsar a ni a, Aston Villa captain hian midfield-ah a thiam thil a 'show' a, a duhthala a che vel chu Wales player tan lu haina tham a tling. 

Kum 25 mi midfielder-in a duh thala ball a sem vel chu football mawina pholangtu a tling a, Calvert-Lewin goal khung tur a siamsakte chu striker tana duhthusama ball ṭha a ni. 

England manager Gareth Southgate tan lawmna tur hlir a ni a, Three Lions squad a nungchang ṭha lo player-ten an tel loin England team a kal thei tih an hmu tel bawk ang. 

Southgate hian Iceland lama an chet dan mawi lo avangin Phil Foden leh Mason Greenwood a ko lo chhunzawm a, Tammy Abraham, Ben Chilwell leh Jadon Sancho chu Covid-19 chungchanga sorkar inkaihhruaina an bawhchhiat avangin telh an ni lo bawk - an tel loin England-in result ṭha an nei. 

Chutihrual chuan England-in an hneh tak Wales hi hliam vanga Gareth Bale tel lohna tih hriat tel a ṭha a, Juventus coach Andrea Pirlo hnuaia hmun pawimawh chang chho Aaron Ramsey a tel lo bawk.

England hian Pathianni zan dar 9:30-ah Nations League match an khel zui dawn a, Belgium nen an inkhelh dawn avangin Wales ai chuan a harsa zawk dawn tih a chiang. 

Wales-in Pathianni tlai dar 6:30-ah British derby an khelh chhunzawm dawn a, Republic of Ireland nen Nations League match an khel ang.