Germany an chak thei tawh ang em?

Germany-in zanin dar 12:15 hian NSC Olimpiyskiy, Kiev-ah Ukraine an hmachhawn dawn. Joachim Low hoten Nations League-ah chak an la nei miah lo a, an group-a team nem bera ngaih Ukraine hi chak theihna hun ṭha a ni ang.

Low-a'n friendly match-ah player naupang zawk chhawrin Turkey nen 3-3 in an inhnehtawk. Ukraine hmachhawn turin player 23 a thlang a, chung zingah chuan Benjamin Henrichs (RB Leipzig), Nico Schulz (Borussia Dortmund), Niklas Stark (Hertha Berlin), Nadiem Amiri (Bayer Leverkusen) leh Mahmoud Dahoud (Borussia Dortmund) te an tel tawh lo.

Germany manager hian chhawr theih turin Manuel Neuer, Niklas Sule, Lukas Klostermann, Joshua Kimmich, Toni Kroos, Timo Werner, Kai Havertz, Leon Goretzka leh Serge Gnabry te an nei a, eng team tan buaina tham a tling.

Chutihrualin tun hnaia an goal chhuah dan en chuan tawnhriat nei ṭha Mats Hummels leh Jerome Boateng te thlauh thlak ringawt avangin demtu pawh an tam hle. Season liam ta khan Hummels leh Boateng te hi club lamah rinrawl an la ni pha a, Low-a rin zawkte an rintlak zo lo.

Bundesliga-a assist record siamtu Thomas Muller pawh Low-a koh tawh loh tur zingah a tel, Germany hian talent nei ṭha tak tak player nei mah se Muller thlak zo an awmin a lang lo. Ukraine lakah Germany-in result ṭha an nei lo a nih chuan Low-a'n pressure a neih belh ang.