UCL squad-ah Romero, Jones leh Rojo tel lo

Manchester United chuan Champions League-a group stage khel tur player an thehluh tawh a, player thar Edinson Cavani, Alex Telles, Facundo Pellistri leh Donny van de Beek te hming a tel vek. Hetihlai hian senior team zinga keeper Sergio Romero leh defender pahnih Phil Jones leh Marcos Rojo te hming a tel lo.

Ole Gunnar Solskjaer hote hi Paris Saint-Germain, RB Leipzig leh Istanbul Basaksehir te nen group khatah an awm ho. Argentine keeper Romero aiah hian  Lee Grant, Dean Henderson leh David de Gea leh te thlan an ni.

Tun hnaiah United tlarhnung pawp mah se Romero leh Jones te tan hmun a awm chuang lo a, anni aia thlante chu Victor Lindelof, Eric Bailly, Harry Maguire, Timothy Fosu-Mensah leh Axel Tuanzebe te an ni a, Teden Mengi pawh academy player a nih angin chhawr theih a ni ang.

Kumin Champions League-ah player panga an thlak theih dawn a, matchday squad-ah player 25 an awm thei dawn. Covid-19 vangin player thlak theih zat hi tih tam a ni a, Bundesliga-ah pawh subsitution panga siam theih a ni a, Premier League-ah erawh club-ten an duh loh avangin football dan pangngai angin player pathum chauh a thlak theih a ni.