Vawiinah HIL khelh chhunzawm dawn

December a khelh ṭan tur I League a hmun ruak pakhat la awm inchuhin Hero I League qualifier final round khelh mek a ni a, Pathianniah pawh inkhel pahnih a awm dawn. 

Ningani zana 1-0 a Garhwal hnehtu Mohammedan SC chuan Pathhian chhun dar 12:30-ah ARA FC an hmachhawn dawn a, Black Panther (Moham-medan sawina) hi squad nei chhah ber ang hiala chhal ngam ni mah se Garhwal laka chak tura injury time an nghah thlen a ngaih dan ngaihtuahin dah san an harsa.

Mohammedan hian Mizo tlangval Vanlalbiaa Chhangte an kawl a, Aizawl FC defender hlui Eze Kingsley leh East Bengal striker hlui Willis Plaza-te an kawl bawk. 

Ahmedabad club ARA lamin ram pawn player langsar kawl lo mah se Syed Shoaib Ahmed hi innghahna tham a tling a, Gokulam Kerala striker hlui hian league round lamah match sarih khelin goal sarih a khung tawh - final round-ah fiahna tak tak a hmachhawn ang. 

Pathianni tlai dar 4:30-ah Garhwal leh Bengaluru United an inkhel dawn bawk a, Bengaluru hian match hmasa berah Bhawanipore an ngam bik loh avangin Delhi club Garhwal ang thoa chak mamawh an ni. 

Bengaluru United hian Trinidad and Tobago international hlui Robert Primus leh Middlesbrough mid-fielder hlui William Opoku an kawl avangin an match hmasa ber result aṭanga teh chi an ni lo.