A che lo lo sih hlawkah

Tata IPL 2024-ah team pathum chauh an dam ta. Zanin dar 7:30 hian qualifier 1-a chak lo Sunrisers Hyderabad leh eliminator 1-a vannei ta zawk Rajasthan Royals ten final khel tur an zawng dawn.

Chennai khelmual chhuanvawr Chepauk-a inkhel tur hi semifinal dik tak tia sawi theih a ni a, chutihrualin IPL-ah chuan semifinal ni loin 'qualifier 2' tih a ni thung. A chak zawk zawkin May 26, Pathianni zanah Kolkata Knight Riders nen final an khel ang.

Mangṭha RCB

Bul ṭan ṭha lo, league stage chanve lama chelh din rual loh khawpa harhtharna chang leh si Royal Challengers Bengaluru te erawh, an khelh tluan kallai leh vanneihna kum a rawn inher ve tawh dawn emaw kan tih lai mekin, ṭhal chhum ang maiin a thamral leh si.

Lungtat a par hma chuan RCB hian IPL nomawi hi an chawi dawn lo a ni ang tih te pawh ka ring ṭan ta deuh rum rum mai. Eliminator game inkhela table-a pathumna Rajasthan Royals leh palina RCB te inkhel erawh a ṭantu mipuite, an hlim leh lawm kar a inthlak zak zak reng mai kha, cricket game tiropuitu leh infiamna khawvel mak danglamna ti mai ang aw!

Sunrisers a êng dawn?

A khaw neitu CSK ber an tla ta si a. A ṭhenawm khua RCB an tla leh ta bawk si nen. Zanina inkhel tur hi semifinal dik tak a nih tawh miau avangin Sunrisers Hyderabad leh Rajasthan Royals te tan sahuai neih zawng zawng phawrh a hun tawh dawn a ni.

League-a pahnihna dinhmun luahtu, kumina T20 khelh dan thar khawvel rawn kawhmuhtu Sunrisers Hyderabad te hi, an ṭhatna lai ber hi an chak lohna lai ber a ni thei lawi si. Chumi tilang chiangtu chu tun Thawhlehni zan Qualifier 2 an khelh ṭuma KKR laka a mualpho danah khan a chiang.

Mit khap kar loa tumpuite tibeidawng vek thei khawpa opening batter Travis Head leh Abhishek Sharma te hi an thih hma hlauh chuan, plan B leh C an lo nei chaurau ve hle tih a lang chiang reng mai. Chumi thlentir tum leh chuan Trent Boult-a'n bowling department lama a hote bulah, "Hemi te pahnih vawm hlum tur hian ball chiah ka mamawh," tia a infuih sauh sauh lai tur vel hi ka mitthla lawk thei.

Nomawi beiseitu RR

Nipui 17 liam taa, IPL hmasa ber an champion ṭum tih lovah chuan, kumin bik hi Rajasthan Royals ten IPL an la khelh ṭhat ber tum a nih ka ring hial.

Sanju Samson, Riyan Parag, Yashasvi Jaiswal leh Shimron Hetmyer te batting-ah an innghat le hle dawn. Mahse tun Eliminator inkhela kan hmuh ang khan, lei rem rah vek tawh hnuah, a chetsual theih. Team an chakpui tawh mai tura an dingtlang tawh dawn emaw tih laiin, an thluak a thawl thut emaw tih mai tur a, ṭul lo deuh deuha an invuakhlum ang kha an ching leh a nih chuan, a pawi thui viau thei ang.

Chennai pitch lam hi a muang lam nge pitch thar ball sawt nuam tawk a ni dawn a hriat loh. Inkhel pawimawh, final luh leh luh loh inkar a nih tawh miau avangin, player-te an ṭang turah ngai ila, lo che lem lo, lo zel thel deuh player nei team te chu sihhlawk an ni mai dawn a ni.

Engpawh nise semi final hmuhnawm i beisei ang.