U20 NFC best player Thathana

Swami Vivekananda U-20 Men's National Football Championship-ah Mizoramin final thleng thei ta lo mah se Mizoram captain Lalthankima chu best player-a thlan a ni. Ainawn rawlthar Thathana hian tun ṭum inelnaah hian Mizoram semifinal a thlenpui a, match nga aṭangin goal sarih a khung.

Thathana hi Aizawl FC Academy chhuak a ni a, tun season ṭan hma khan coach B. Malsawmzuala (Sawmtea) zuiin Kalighat Sports Lovers Association tan Calcutta Football League first divison-ah a khel a, CFL premier division khel turin a tlinpui.

Santosh Trophy final round-ah Thathana hi Mizoram senior team tana koh a ni a, Arunachal Pradesh-a khelh inelnaah Mizoram tan player pawimawh niin semifinal a thlenpui. U20 NFC-ah Thathana a langsar lehzual a, an champion lo chungin Best Player a ni hial. Thathana chuan, "Pathian vang liau liau a nia, Pathian hnenah lawmthu sawi sen loh ka ba a ni," tiin Vanglaini a hrilh.

Inelnaah hian semifinal-a Mizoram hneh loh Delhi an champion a, final-ah Karnataka nen 3-3 a an inhnehtawk hnuin penalty shootout hmangin 4-3 in an hneh. Ramakrishna Mission Ashrama Ground, Narainpur, Chhattisgarh-ah inelna hi neih a ni.