Ngaihlai bang lo tur Jurgen Klopp

“Kei chu duhthu sam ṭhin mi ka ni lo a, football zuna uai ve mai ka ni," te kha a tia - kha German pa, ṭawngkam thiam em em, a player leh coaching staff-te zawng zawng ngainat rawn kha a chanchin kan sawi dawn apiangin, "Liverpool boss hlui..." tia bul ṭan a ngai ta.

Liverpool fan-ten beiseina an neih leh ṭanna kha a ni a, Klopp 'kher' hi la lut lo se, Reds hi an awmna ngaiah khan awm rengin, "Hmanah chuan..." tih bawkin an club chanchin an sawi lo ang tih tu nge sawi thei? He coach hian Liverpool a thlak danglam tih loh rual a ni lo.

Reds manager ni chunga a press conference hmasa berah khan Jose Mourinho-a'n, 'The Special One' hming lem a inpek anga special a nih ve leh nih ve loh an zawt a, "Kei chu 'The Normal One' ka ni e," a tihte kha a mawi a, a mizia thui tak chu chuan a hrilhfiah bawk.

Chu mai a ni hleinem, "I thlen tirhin mipuiin eng angin nge an lo ngaih che, tih hi a pawimawh ber a ni lo. I chhuah dawnah eng angin nge an ngaih che tih hi a pawimawh ber," tiin a press conference hmasa berah khan a sawi a, Anfield a chhuahsan meuh chuan legend angin a chhuak ta.

Chutiang taka coach ropui chuan eng ang sulhnu chiah nge a lo hnutchhiah a, a Liverpool zinkawng chu eng tiang takin nge a lo zawh a, eng tiangin nge season a lo hman ṭhin kan tarlang dawn a ni.

8 October 2015: Jurgen Klopp-a'n Liverpool a zawm a, kum thum daih contract a ziak.

2015-16: Klopp-a'n Liverpool-a a season hmasa ber a ni a, Premier League-ah pariatna niin season a kharpui a, Europa League leh League Cup-ah final a luhpui thung. Mahse, final-ah an chak zo lo ve ve a, nomawi chawi loin season an khar.

2016-17: Klopp-a'n Liverpool-a season tluan a hman hmasak ber a ni a, European football an khel lo. Premier League-ah palina niin Champions League-ah a hruai kir a, season ṭan dawna a player lakluh zingah Reds-a a hlawhtlin theih nana player ṭangkai Joel Matip, Sadio Mane leh Georginio Wijnaldum te an tel.

2017-18: German coach-in thlasik transfer-ah Philippe Coutinho a chelh thei lo a, Barcelona hnenah pound maktaduai 100 chuangin an kaltir. Mahse, "Kan hloh hlepah kan chhiar" tih ang mai a ni a, he sum hmang hian Virgil van Dijk chu £75mtd-in an la lut a, nipui laiin Mohamed Salah a lei bawk.

Liverpool-in palina ni chungin Premier League an khar a, Champions League final lut mah se, Real Madrid chu 3-1 in an ngam lo a, Salah chuan Liverpool-a a season khatnaah hian goal 44 a khung nghal - Liverpool an insiamrem ṭan tih a lang.

2018-19: Premier League-ah season tluanin vawi khat chiah an tlawm a, an champion chuang lo! Reds hian point 97 zet an hlawh chhuak a, mahse, point 98 neitu City phak loin Premier League nomawi an chawi thei lo.

Mahse, Champions League semifinal-ah, football chanchin ropui sawi apianga sawi reng tawh tur an thlentir a, Barcelona lakah comeback ropui an lantir. Barcelona hi first leg-ah 3-0 in ngam lo mah se, second leg-ah 4-0 in sawp a, final an lut. Final-ah Tottenham Hotspur chu 2-0 in an hneh zui a, champion nomawi an chawi.

2019-20: August 2019-ah UEFA Super Cup champion niin season bul an ṭan a, December-ah FIFA Club World Cup champion an ni bawk. He season hi Liverpool fan-ten an nghahhlelh em em hun hlimawm an tawnna season a ni nghal. Premier League-ah champion nomawi an chawi a, point 99 ngawt an hlawh chhuak! Anmahni hnaih bertu Manchester City-in point 81 an nei a, a vawi khat nan Premier League-ah Reds an champion.

December 2019: Klopp-a'n contract thar a ziak a, Liverpool-a kum 2024 thleng cham turin rinawmna thu a tiam - Reds fan-te an hlim hle. Klopp hian, "He club hi hmun nuam tak a ni a, chhuahsan tur angin ka rilru ka seng thei lo a ni," a ti.

2020-21: FA Community Shield-a Arsenal hneh loin season bul an ṭan a, nipui transfer-ah Thiago Alcantara leh Diogo Jota an lakluh avangin beiseina sang mah se, nomawi chawi loin season an thlah liam. Season hnih a zawna nomawi an chawi hnuah Liverpool-in nomawi chawi loin season an hmang.

2021-22: League match riat a zawna tlawm nei loin season bul an ṭan a, 24 October 2021-ah Manchester United chu Old Traffor-ah 5-0 ngawtin an sawp a, Klopp-a'n Liverpool a kaihhruai vawi 331-na niin, vawi 200 hnehna a chanpuina chiah a ni a, Reds manager awm tawh zinga vawi 200 chak tling tura match mamawh tlem ber a ni. December 1-ah Everton chu 4-1 in an hneh a, English top flight club zinga inelna hrang hranga a zawna match 18 chhung goal hnih khung tling ziah thei hmasa ber an ni.

December 7-ah AC Milan chu 2-1 in an hneh a, English club zinga Champions League group stage match ruka chak vek thei hmasa ber an ni. December 16-ah 3-1 in Newcastle United an hneh a, Klopp chu Liverpool manager zinga league match 150 chak rang ber a ni a, top flight league-a Reds an vawi 2000 chakna chiah a ni bawk.

Mahse, heti taka season an hmang ṭha chung hian Premier League-ah an champion chuang lo! Liverpool hian point 92 an hmu a, champion City chu point khatin an phak lo. Liverpool hian FA Cup leh League Cup-ah champion nomawi an chawi a, Champions League final lut mah se, Real Madrid chu 1-0 in an ngam lo bawk.

28 April 2022: Klopp-a'n duhtu tam tak nei mah se, Anfield-a cham chhunzawm zel a thlang a, kum 2026 thleng Liverpool enkawl turin rinawmna thu a tiam nawn. Klopp chuan, "Contract thar zawrh ka nih khan, he club ropui tak kaihruai zel tur hian thathona ka la nei em? tih ka inzawt a, chhang turin hun ka duh rei lo. He hmun hi ka hmangaih a, nuam ka ti a ni," a ti a, Liverpool fan-ten hriat nuam an ti.

2022-23: Klopp-a hnuaia Liverpool season hman chhiat ber ang hial pawhin a chhal theih ang. Nipui transfer-ah Bayern Munich panin player pawimawh Sadio Mane a chhuak a, Darwin Nunez an la lut thung. Thlasik transfer-ah Cody Gakpo an la bawk. Reds hian FA Community Shield nen season bul ṭan mah se, a bak nomawi chawi an nei tawh lo - Premier League-ah pangana niin, Klopp hnuaia season tluan an khelh hnua a vawi khat nan Champions League an khel phak lo.

2023-24: Liverpool hlawhtlin nana player langsar Jordan Henderson, Roberto Firmino, James Milner, Fabinho, Alex Oxlade-Chamberlain leh Naby Keita te ho an chhuak a, Liverpool-in Klopp hoa indinthar an tum niin a lang. Reds hian player langsar an chhuahtir nual chungin, Alexis Mac Allister, Dominik Szoboszlai, Wataru Endo leh Ryan Gravenberch te an la lut a, beiseina an nei sang.

Mahse, Klopp-a'n January 26, 2024-ah Liverpool a chhuahsan tur thu a sawi a, fans tam tak a ṭhawng. Hemi hnuah League Cup-ah champion mah se, FA Cup leh Europa League quarterfinal aṭangin petchhuah an ni a, April thlatir thleng Premier League hmahruaitu ni mah se, season tawp lamah chesualin pathumnaa lungawi an zir.

A tawp ta: May 19, Pathianni a thleng a, Klopp-a'n Liverpool a chhuahsan ta. German coach hian Liverpool-ah hun a hman chhungin player 37 a la lut a, anni ho lakluh nan hian £850mtd a seng a, a player lei zinga man to ber chu £85mtd man Darwin Nunez niin, kum 2021-a Preston North End aṭanga £2mtd-a centre-back Ben Davies a lei chu player lei nana a sen tlem ber a ni.

Klopp hian man to taka player hralhte pawh a nei tho. Philippe Coutinho chu £105mtd leh result a zir a man pung thei turin a hralh a, hemi sum hmang hian Virgil van Dijk (£75mtd) leh keeper Alisson (£67mtd) a lei a, Liverpool indinthar lehna kawnga transfer pawimawh tawpkhawk, tiin a sawi theih.

German coach hian Liverpool a enkawl chhungin, player hralhna aṭanga sum hmuh nena chhutin, player lei nan Premier League club lian panga zingah sum a seng tlem ber - £400mtd vel seng ang a ni a, Manchester City (£700mtd), Arsenal (£700mtd), Manchester United (£800mtd) leh Chelsea (£1.0tld) te aiin a seng tlem.