MFA president Mizoram Sports Minister

Mizoram Football Association chuan nimin khan Aijal Club-ah annual general body meeting an nei a, kum 2024-2027 hruaitu tur an thlang. President atan MFA honorary secretary nilai Lalnghinglova Hmar (Tetea Hmar) chu thlan a ni a, AIFF-ah League Committee chairman a nih bakah Mizoram Sports Minister a ni mek bawk.

President leh Secy thar

Tetea Hmar hian MFA honorary secretary a nih laiin Mizoram football hmel a thlak danglam nasa hle. A hun lai hian India ram chhunga state league changtlung ber zinga mi Mizoram Premier League a duang chhuak a, MPL awm hnuah Mizoramin Santosh Trophy-ah a vawi khat nan nomawi an chawi a, National Games-ah gold medal an la bawk.

I League-ah Aizawl FC an inpetling a, Mizo club hi NorthEast aṭanga I League champion thei hmasa ber an ni bawk. AFC-in nomawi an chawi lai hian I League chu India rama league sang ber a ni.

Electric Veng pa Lalrengpuia chu honorary secretary atan thlan tlin a ni a, Renga hi MFA Executive Committee member a nih bakah AIFF Futsal Committee-ah a awm mek. MFA leh Reliance thawhhona kawngah a pawimawh a, heng zingah hian Naupang League a langsar.

MFA hnathawh

MFA hian kuminah ṭum danga an buatsaih ṭhin MPL10 hlawhtling takin an buatsaih a, a vawi khat nan Mizoram Police an champion. I Day Football-ah Chhinga Veng FC an champion a, women's foobtall leh veteran football buatsaih telin Pachhunga University College leh Generation 90's te an champion.

District hrang hrang club-te inelna MFA Cup-ah MLS FC, Lawngtlai an champion. Hmeichhe lamah pawh District inelna buatsaih a ni a, Aizawl DFA an champion. Hmeichhe pual bikin MFA Women's League leh Khelo India Women's League neih a ni a, Mizo Football News FC leh Springfield HSS te an champion bawk.

India ram pum huap inelnaah Mizoram team an che chhe lo. Santosh Trophy-ah Mizoramin semifinal an thleng a, National Games khel turin an tling. Swami Vivekananda U20 National Football C'ship-ah pawh semifinal an thleng.

Sub Junior inelnaah Mizoram mipa team an champion a, final-ah Manipur 3-0 in an hneh. MFA hian football-a hma sawn theih nan tun season chhungin AIFF D Certificate Course vawi hnih a buatsaih a, AFC C Diploma Course ṭum khat a buatsaih bawk.

MFA OB Thar
President - Lalnghinglova Hmar
Sr. Vice President - PC Vanlalhruaia
Vice President - Lalruatsanga Tochhawng
Hony. Secretary - Lalrengpuia
Joint Secretary - Lalrawngbawla
Treasurer - C. Vanlalmawia
Fin. Secretary - LV Lalthantluanga