Bayern leh Kompany an inhnaih

Manager zawng lai Bayern Munich chuan Vincent Kompany an bia a, thui tak inbe tawhin inrem theih ngei pawh an beisei - Burnley manager hian German club lian a enkawl daih a nih pawhin a mak lo ang.

Bayern Munich hian Thomas Tuchel kaihhruaina hnuaiah beisei an phak lo, a zawna season 11 chhung an lak tawh Bundesliga title pawh Bayer Leverkusen lakah an chan, an coach Tuchel hi inbiakpui leh hnuhnawh mah se an inrem thei lo - a chhuak ngei dawn.

Tuchel hmunruak luah khat thei tur an zawng a, manager tawnhriat ngah leh sulhnu ropui tak tak nei aiin hmabak nei eng leh Bavarians khelh dan ang taka khelh chhuah tir thei tur an zawng mek a ni.

Manchester City captain hlui Kompany hian Championship aṭangin Burnley hi Premier League a kaipui a, English football inelna sang berah hian season liamta khan vawi nga chiah an chak a, inelna hniam lamah an thla thla zui leh nghal.

Kompany hian Bayern hi a zawmd awn a nih chuan, a coaching team ten an zui ang tih thlengin tarlan a ni tawh, amah zui tur zingah hian Wales international hlui Craig Bellamy pawh a tel.

Bayern Munich tan manager ṭha hmuh hi thil awlsam a ni ngawt bik lo - Bayer Leverkusen manager Xabi Alonso, Germany chief Julian Nagelsmann leh Austria coach Ralf Rangnick ten Bayern sawmna an lo hnar vek tawh a ni.