Chhinga Veng hmaah Zarkawt

Cricket Assocaition of Mizoram (CAM) hnuaia inelna lian leh ngaihhlut - Mapuia Memorial Mizoram Cricket League (MCL) chu nimin khan league round khelh zawh a ni a, vawiin hian Chhinga Veng leh Zarkawt Lords ten qualifier 1 an khel chhunzawm nghal ang.

Nimin khan Suaka Cricket Ground Sihhmuiah Zarkawt Lords hian Ṭhuampui Chinari chu wicket sarihin an hneh a, table-ah pahnihna an ni. An chunga awm Chhinga Veng hi vawi li khelha chak kim thei awmchhun an ni thung.

Qualifier 1-a chak hian final an lut nghal dawn, a chak lo zawk pawhin beisei an la nei dawn - qualifier 1 chak lo hian qualifier 2 a chak zawk nen final luh an la inchuh leh dawn a ni.

Eliminator-ah Kulikawn leh Ramhlun Venglai te an inhmachhawn dawn, a chak zawk hi qualifier 2 khel turin an tling dawn chauh tihna a ni a, league round lama chet ṭhat khan kawngro nasa takin a su a ni.