Inter Milan-in neitu thar an nei

Serie A champion Inter Milan chuan league nomawi an chawi aṭanga ni thumnaah neitu thar an nei a, US investment fund Oaktree Capital Management chuan Inter neitu nihna an chang - hei hi Italian club neitu Suning ten an loan lak an rulh theih loh vang a ni.

Inter Milan hian Oaktree hnen aṭang hian sum engemaw zat an puk a, an sum puk hi a punna nen chuan euro maktaduai 395 rulh tur a ni. Mahse, hun tiam chhunga an rulh hman loh avangin Oaktree hian Inter neitu nihna an nei zui.

Serie A nomawi chawi hnu lawka hriat atan chuan thil hriat nuam tak a ni lo ang tih a chiang a, hralh pawh ni lo, leiba ngah vanga inchhuhsak an nih avangin Inter fan-ten hlauthawng takin thil thlen zel dan tur an thlir mek ang.

Khawthlang media ṭhenkhat chuan Oaktree hian Serie A champion hi hralh an tum mai ang em, tiin zawhna an nei a, mahse, tun dinhmuna a lan dan chuan American company hian Inter hi hralh tumna an nei rih lo.

Leiba chu

Inter hian May 2021 khan Oaktree hnen aṭang hian loan an la a, an loan lak zat hi €275mtd a ni. Pawl pahnih inremnaah chuan Inter hian an sum puk hi a vaiin an rul leh ang a, a punna tur zat chu 12% a ni ang.

Italian club hi May 21, Thawhlehni thleng kha an sum puk rulhna hun hi pek an ni a, an sum puk hi a punna nen chuan €395mtd a ni tawh. Mahse, Inter hian hun tiam chhungin an rul hman lo a, Oaktree hian man man takin Italian club an nei, tiin a sawi theih.

Suning hian Inter enkawl nana an sum pukte rulh a nih theih nan Inter hi hun rei tak chhung chu hralh an lo tum tawh a, mahse, €1.2tld lai an chhiar avangin an phalna ang zata dawrtu hi an awm lo niin an sawi.

"Duham chu chânna" tih ang deuhin, Suning-in Inter man zat atana an duh tam luatah an loan rulh hun atana hun tiam a ral hman a, an chhiar aia a leta tlawmin Inter an chân leh ta tho - an kal zel dan tur hriat a châkawm hle.

Hmabak

Oaktree managing director Alejandro Cano chuan, "Inter neitu thar kan nihna angin, Inter club sulhnu ropui tak leh he club chhungkaw tana kan mawhphurhna sanzia hi kan hria a ni.

"Club kal zel dan tur leh, sum leh paia a din nghehna tur hi keini chuan kan ngaih pawimawh hmasak ber tur a ni a, Inter Milan management team-te kan zah em em a, he club kal zelna tura kan hmalakna kawnga thawhho kan châk tawh hle," a ti.

Cano-a ṭawngkam aṭanga a lan danin American company hian Inter hi hralh mai an tum dawn lo niin a lang a, Serie A club, American sumdawng hnuaia awm pasarihna an ni dawn tihna a ni - AC Milan, Atalanta, Fiorentina, Roma leh Genoa bakah kai thar Parma te chu American sumdawng hausa hnuaia awm vek an ni.

Oaktree hian an enkawl zui chuan, eng ang takin nge kaihhruai an tum ang, hriatthiam a la harsa rih hle. Oaktree dintu zinga langsar zual Bruce Karsh leh Howard Marks ten dollar tluklehdingawn hnih chuang ve ve an nei a, a sum zawng chuan an him viau!

A har a ni

Inter president hlui Steven Zhang chuan Inter fan-te hnenah Oaktree-in harsatna an siam dan a lo sawi tawh a, Suning dintu Zhang Jindong-a fapa kum 32 mi hian Oaktree nena inremna neih an tum chu American firm lam hian an hnawl zel niin a sawi.

Zhang chuan, "Theihtawp chhuahin Oaktree nen hian inrem theih dan tur kan dap a, an sum zawng zawng a rang thei ang bera an hmuh let theih dan tur kawng hrang hrang pawh kan sawi ho. Mahse, vanduaithlak takin dan anga hmalakah te min vau a, awmze neiin indawrna kalpui an duh lo.

"Hetianga indawrna a kal hi a hrehawmin a lungawithlak loh takzet a, club dinhmun thlengin a tiderthawng ta em em mai a ni. Inter President ka nihna angin, khawvel hmun hrang hranga kan fan-te chu he club him nan hian theihtawp ka chhuah zel dawn tih ka tiam duh a ni.

"Oaktree nen thil a kal fel theih nan theihtawp kan chhuah zel ang a, kan hmangaih em em Inter hlawhtlinna thawnthu hi chhunzawm zel kan tum ang," tiin kartawpah khan a sawi a, mahse, tunah chuan Oaktree kutah engkim a awm ta.

Kan lawm e

Suning tan chuan Inter an lo nei kher hi sum hlohna hlang a ni ber - kum 2016-a Italian club an lei aṭang khan €800mtd zet an seng tawh a, tunah loan rulh theih loh avangin a vaiin an chân leh ta bawk. Mahse, Suning-in Inter an enkawl chhung hian hlawhtlinna tam tak an chhar a, hei vang hian Inter ṭantute chuan Chinese sumdawng hausate hi an sawisel duh lo.

Kum ruk chuang an champion loh hnuah Serie A champion an ni a, vawi hnih an champion. Coppa Italia (2) leh Supercoppa Italiana (3) champion an ni bawk a, Champions League nomawi chawi ta chiah lo mah se, final an lut bawk. Hei vang hian Inter ṭantu ruhkawl pawl Curva Nord chuan thuchhuah siamin, Zhang chu duhsakna an hlan.

Curva Nord chuan, "Inter tana a hnathawh leh a hnuaia kan result duhawm takte avangin President Steven Zhang chungah lawmthu kan sawi a ni. San Siro-ah inhmuh leh thuai kan beisei a, amah leh a hmangaihte chu an mimal leh sumdawnna kawngah hlawhtlinna tam tak an chhar zel kan duhsak a ni," an ti.

Inter ṭantute chuan club neitu thar chungah beiseina sang tak an neih thu sawi nghalin, "Curva Nord chuan kan President valai tak thlaktute chu tuna kan hmachhawp neih mekte chhunzawm a, Inter sulhnu leh he club ṭhanlenpuitute zai ngai chung zela kal turin kan beisei a ni," an ti a, Zhang-a hmachhawp chhunzawm turin an beisei.