Season bul ṭan lo tur Neymar

Neymar hliam a la dam fel thei lo a, tuna a lan dan chuan season thar bul an ṭan hunah pawh Brazilian forward hi a la inkhel thei ve dawn lo tihna a ni.

Paris Saint Germain aṭanga Al Hilal a zawm hnu lawkah Neymar hi a khup a hliam, tun season chhungin khelmual a hmel hmuh tur a awm chhunzawm lo a, nikum October thla chawhnu lamah a la inkhel leh lo.

A hliam vang hian Copa America khel tur Brazil squad-ah pawh telh a ni lo. Club lamah chuan inlan lo mah se Al Hilal chu a vawi 19 nan Saudi Pro League champion an ni tho a, an ram hian a tel loa khelh an zir ve a ngai thung tihna a ni.

Al Hilal coach Jorge Jesus chuan, "Neymar hliam ang kha hi a rei lo berah thla 10 aṭanga thla 11 an chawlh a ngai ṭhin a, chhiarkawp dan anga chhut mai chuan season thar tir lamah min la zawm thei dawn rih lo," a ti.

Dan pangngai ang chuan August thlaah Saudi Pro League hi an khel ṭhin a, kuminah pawh an kalphung hi an thlak thut a rinawm lem loh.

Neymar hian a vanglai hun ṭha tam tak chu hliam vanga chawlh nan a hmang, sum erawh a hlawh hnem hle thung. Al Hilal-ah hian season khat chhung euro maktaduai 100 a hlawh phak a, a club hlui PSG aṭangin euro maktaduai 100 tho a dawng bawk.