Gerard Nus a inpeih tawh

Indian Super League a NorthEast United coach Gerard Nus chuan a player neih danah a hlim tawk thu a sawi a, Indian football a a season hmasa berah ISL hmachhawn turin a inpeih tawh hle. 

Kum 35 mi coach chuan, "Ka squad neih danah ka lawm a, player kan lakluhah pawh ka hlim hle. Tawnhriat nei ṭha player karah kum naupang kan nei ṭha bawk a, team ṭha tak din theih kan beisei a ni," a ti. 

Liverpool coaching staff zingah pawh lo tel tawh Nus enkawlna hnuaiah Mizo player pawh an khel nual dawn. Season hmasa lama ISL lo khel tawh midfielder Lalengmawi (Apuia) a la awm a, Kelkang tlangval Lalkhawpuimawia (Mapuia), Aizawl FC forward Rochharzela leh Jonathan Lalrawngbawla te an lalut bawk. 

NorthEast United hi Guinea international Idrissa Sylla nen sawi zawm mek an ni bawk a, kum 29 mi striker hi Belgian club ṭha Anderlecht leh Championship club Queen Park Rangers tan pawha lo khel tawh a nih avangin a chhe lo.