Sunrisers chakna Warner leh Bairstow

Sunrisers Hyderabad-in Ningani zan khan Kings XI Punjab run 69-in an sawp. Dubai International Stadium-ah Sunrisers tan opener David Warner (52) leh Jonny Bairstow (97) te an khel ṭha a, English batsman Bairstow hi player of the match a ni.

Orange Army-in (Hyderabad sawina) vuak hmasak an thlang a, captain Warner-a'n thutlukna a siam ṭha. Indian batsman-te che ṭha lo deuh mah se foreign player-te an che ṭha hle.Captain Warner-a'n half century a siam a, Bairstow-a'n run thum chauhin century a phak lo. New Zealand star Kane Williamson pawhin thi loin ball 10-ah run 20 a siam a, over 20-ah run 201/6 an siam.

Punjab tan target a harsa a, Afghan bowler Rashid Khan-a'n harsatna a belhchhah. Sunrisers bowler Rashid wicket thum lain run 12 chauh a pe! Kings XI bowler zingah Nicholas Pooran-a'n run 77 a siam a, Pooran a che ṭha chungin run 132 chauh an siam a, over 16.5-ah an thi fai vek.

Vawiin hian IPL match hnih a awm dawn. Tlai dar 3:30-ah Kings XI Punjab leh Kolkata Knight Riders te an inkhel ang a; zan dar 7:30-ah Chennai Super Kings leh Royal Challengers Bangalore te an inhmachhawn leh ang.