Zanin dar 7:30-ah FA Cup final : Manchester City vs Manchester United

FA Cup final chu zanin dar 7:30 hian Wembley Stadium-ah khelh a ni dawn a, Manchester City leh Manchester United ten nomawi an inchuh dawn avangin ngaihven an hlawh ang. Premier League champion City-in double champion nichunga season khar an duh ang a, Man United tan erawh nomawi ringawt a ni lo.

Erik Ten Hag-a hoten nomawi an chawi a nih chuan season tharah Europa League an khel dawn a, an chak lo a nih erawh chuan European competition lamah hahdamna hun pek an ni ang. Man United-in neitu thar an neih avangin Dutch manager Ten Hag-a hmalam hun a chiang lo a, mi ṭhenkhat chuan FA Cup nomawi hmangin a hna hi a hum theih an ring.

Vana rah ang?

Kum 2009 khan Sir Alex Ferguson chuan, "Ka dam chhungin Manchester Derby-ah City hi rinkai zawk an ni ngai lo ang," tiin a sawi a, kum 10 hnu lekah club pahnih inkhelh apiangin City hi chak tura rinkai zawk an ni tawh.

Pep Guardiola-a'n engkim a thlak danglam a, Spanish manager hian Sir Alex-a hnuaia Man United tih theih loh, a zawna vawi li Premier League champion pawh an ti thei tlat. Tun ṭum inkhelah pawh City hi rinkai zawk hret ni mai loin, champion ngei tura ngaih an ni hial.

Manchester derby hnuhnung pasarihah Man United hi vawi ruk ngawt an chak lo a, hei hian team pahnih inthlauhzia a pholang. Season liam ta pawh khan FA Cup final-ah club pahnih hi an inhmachhawn a, City hi inkhel thunun chungin 2-1 in an chak.

Tun dinhmunah chuan Man United tan Pep-a enkawl City hneh hi vana rah ang hial a ni. Chutihrualin FA Cup bikah erawh an intawn hnuhnung vawi sarihah United hi vawi nga an chak. Mahse, uluk zawka thil awm dan bihchian chuan, City hian 2023 final leh 2011 semifinal-ah an hneh. United-in FA Cup-a an hmelma an hneh um chu City-in Arab sum mawm an chawm hma a ni.

City an nghet

Tun season Premier League thlirletin Man City pau khauh zia a lang a, pressure sangah an talbuai ve lo tih a lang bawk. Pep Guardiola hote hian kuminah hun pangngaiah hneh loh an la tawng lo a, Premier League-ah phei chuan April thla aṭang khan an chak vek.

Man City hi an rilru a paukhauh a ni ringawt lo a, an squad a chhah ṭha tel bawk. Rodri hi an chakna hnar a ni a, Spanish midfielder hian inkhel bul a ṭan tawh chuan February 2023 aṭang khan hneh loh an tawng tawh lo. Rodri hian hemi chhung hian Premier League, Champions League, FA Cup, leh League Cup-ah match 74 a khel a, City hi vawi 56 chakin vawi 16 an inhnehtawk.

Rodri-a'n a hna a tlin bawk a, a hmaa awm Phil Foden leh Kevin de Bruyne te an zalen theih phah. Foden hi India rama FIFA World Cup Under 17 an khelh ṭuma best player kha a ni a, palian lo mah se pa te hmang thiam Pep-a hnuaiah a vul hle. Tun season Premier League-ah player of the season-ah thlan a ni a, tun dinhmunah tak phei chuan goal khung khawl Erling Haaland aiin goal hmaah a ke a hmui zawk.

Chutihrualin Haaland erawh a khelh chhiat ṭum pawhin khingpui defender-te tan ven tho a ṭul a, City game plan ti hlawhtlingtu pakhat a ni. Norwegian striker hian derby hi nuam a ti viau bawk. Haaland hian United hi match li hmachhawn tawhin goal ruk leh assist vawi thum a nei tawh a, zaninah pawh ven uluk a ṭul ang.

KDB erawhin tun hma pha lo hretin lang mah se ṭhiante siam leh pet goal dan a la theihnghilh lo. City-in goal an mamawh a nih chuan Jeremy Doku leh Julian Alvarez te an la kawl bawk a, buaipui tham ve ve an ni.

Mahse, City hian hliam vangin Ederson an chhawr thei dawn lo a, Stefan Ortega chungah mawhphurhna a tla ang. Ortega hi back up goalkeeper anga thlir ngawt chi a ni lo a, Arsenal champion-an kawng daltu a ni. A chhan chu Son Heung-min goal khung tur a dang tlat.

Beisei nei Man United

Man United-in Premier League match hnuhnung pahnihah Newcastle United leh Brighton & Hove Albion te an hneh a, Old Trafford-a league match hnuhnung ber an khelh zawhah Erik Ten Hag chuan FA Cup nomawi an chawi theih nan player-ten an theihna zawng zawng an chhuah tur thu a sawi.

Dutch manager Ten Hag hi tun season-ah che ṭha tawk lo mah se a record thlir kirin nomawi chawi thiam tia sawi theih a ni. Ajax a enkawl laiin season tinin nomawi a chawi a, Man United a enkawl hnuah pawh League Cup nomawi a chawi tawh. FA Cup-ah kum zawnin final a lut a, hemi hian kum zawn thoin Dutch Cup-ah final a lut.

Ten Hag chuan, "Nomawi chawi turin ka rawn kal a, Inrinni zan hian kei leh ka team-ten nomawi chawina hun ṭha kan nei. FA Cup final hi inkhel pawimawh bik a ni a, season kan hmang ṭha lo chungin nomawi chawi thei dinhmunah kan ding. A awlsam dawn lo tih kan hria a, chutihrualin nomawi kan chawi thei tih kan hriat a, kan beisei ngam a ngai. Team ṭha lakah kan khel ṭha ṭhin a, FA Cup final-ah a danglam lo ang," tiin a sawi.

Man United chhuanvawr ni ṭhin Marcus Rashford chu England team-ah ko a ni lo a, Ten Hag erawhin English forward fuihtu ṭhaah a ngai thung. Dutch manager chuan, "Dinhmun ṭhat lai leh chhiat lai chu player tinin an tawng. Dinhmun chhiat lai hian player a fuih phur a, Marcus Rashford pawh a ṭan phah ang. Tuna a dinhmun harsa hi a su kiang ang a, goal tam zawk a khung ngei ang," tiin a sawi a, Rashford hi a che ṭha a nih chuan English media-ten a ko duh lotu Gareth Southgate demna an chhak chhuak thei hial ang.

Engtin zel?

Man United-in hliam vangin Luke Shaw leh Tyrell Malacia te an la chhawr thei dawn lo a, Harry Maguire a la tel thei dawn lo bawk. Mahse, Victor Lindelof, Mason Mount leh Anthony Martial te chu rawn kir thei dinhmunah an ding.

Argentine defender Lisandro Martinez-a'n league match hnuhnung berah bul a ṭan leh tawh a, bench aṭangin Raphael Varane a lut tawh bawk. A hun takah defence lai buaina chinfelin a awmah a ngaih theih a, mah se an khingpui tur hi Man City an nih miau avangin inthuam ṭhat a ṭul khawp ang.

Tlarhma lamah Rasmus Hojlund-a'n match hnuhnung pahnihah goal a khung ve ve a, mahse Danish striker hi bench aṭangin a lut ve ve. FA Cup final-ah pawh Hojlund hi bench-a awm thei dinhmunah a ding. Man United-in tun season-a an player che ṭha hnenah chawimawina an sem. Alejandro Garnacho-a'n goal of the season award a dawng a, Sir Matt Busby Player of the Year chu captain Bruno Fernandes hnenah hlan niin Diogo Dalot hnenah Player's Player of the Year chawimawina an pe, player pathum hi final-ah an pawimawh vek ang.

Man United-in Europa League khel turin Man City hneh ngei a ṭul a, an chak lo erawh chuan Chelsea leh Newcastle United an lawm thung ang. City an champion chuan Blues-in Europa League an khel ang a, Magpies-in Conference League an khelh theih phah bawk ang.

Erik Ten Hag hmalam hun hi a chiang thuai bawk dawn. Man United hian Dutch manager ropui Louis van Gaal pawh FA Cup champion lawm hmain an ban thu an puang nghal a, Ten Hag chungah pawh hei hi thleng thei a ni. Mahse, manager ṭha lak mai theih an van avangin Pep-a enkawl City meuh an hneh chuan contract neihsa hman zawh tir chu a phu viau thung.