Euro 2020-ah Haaland a tel dawn lo

European Championship Playoff-ah Ningani zan khan Serbia-in extra time-ah Norway 2-1 in an hneh a,  Euro 2020-ah Norwegian striker Erling Braut Haaland a tel dawn lo tihna a ni.

Serbia hian Europe-a football ram inelna sang ber khel turin November 12 hian Red Star Stadium, Belgrade-ah Scotland an mikhual ang. Scotland hian playoff final lut turin penalty shootout hmangin Israel an hneh.

Haaland a 'nil'

Ullevaal Stadion, Oslo-ah khelh a ni a, mualneitu Norway-in beiseina sang tak nei mah se Serbia-in bul an ṭan ṭha zawk.  Ṭan phat aṭangin Serbia lamin chance an nei mawlh mawlh a, Borussia Dortmund striker Haaland-a'n ball ṭha a hmu thei lo.

Chance ṭhahnem tak a awm chungin first half-ah goal a lut lo. Danglamna thlentu chu minute 80-naa lut Sergej Milinkovic-Savic a ni a, Lazio midfielder hian minute khat pawh tling loah a pet goal nghal. Fulham striker Aleksandar Mitrovic siamsak a ni.

Serbia-in chakna goal-ah an ngai a, amaherawhchu Norway tan Mathias Normann-a'n ṭha zetin a pet goal. Extra time-ah Serbia-in an nawr bet a, Darko Lazovic-a'n goal ban a pet per a, Dusan Tadic-a'n hnai tak aṭangin a pet goal lo. Amaherawhchu Tadic-a ball pek chu Milinkovic-Savic-a'n fing zetin a 'chip' a, keeper Rune Jarstein bumin Serbia chakna goal a ni zui bawk.

Norway coach Lars Lagerback chuan, "Kan ṭha tawk lo tih chu ka pawm a, chutihrualin Serbia hi kan tum theih zinga ṭha ber an ni. Min ṭantuten min dah sang lutuk hret a, Serbia an dah hniam bawk. Tawnhriat an nei ṭha a, kan hneh lo a ni," tiin a khingpuite a fak.

Norway leh Serbia inkhel hi a hmunah mi 200 velin an en a, Hampden a Scotland leh Israel inkhelah erawh entu an awm lo. Mualneitu Scotland hian Covid-19 vangin Stuart Armstrong, Kieran Tierney leh Ryan Christie te an chhawr thei lo a, hliam vangin Scott McKenna, Liam Palmer, James Forrest leh Oliver Burke te an hmang thei lo bawk.

Kim loa khel Scotland tan Andy Robertson-a'n freekick aṭangin a hlah a, Scott McTominay-a'n tauh goal theihna turah goal zawnah a tauh lo bawk. Manchester United midfielder hi Scotland-in defence pathum zinga pakhatah an chhawr.

Hun pangngaiah goal a lut lo a, extra time-ah a lut chuang lo. Scotland keeper David Marshall-a'n Israeli attacking midfielder Eran Zahavi penalty pet a dang a, mualneitu lama pet John McGinn, Callum McGregor, Scott McTominay, Lawrence Shankland leh Kenny McLean ten an pet goal vek.

Scotland hian 1996 hnuah European Championship an la khel leh lo a, inelna lian tham an khelh hnuhnun ber chu 1998 World Cup daih tawh kha a ni. Tunah chuan Scotland tan Euro 2020 khel turin Serbia hneh chiah a ngai tawh a, minute 90 chiahin inelna lian hi dai dan mah se khualmuala khel tur an nih avangin kawng awlsam erawh a ni lo.

Iceland-in an khawpui Reykjavik-ah Romania an mikhual a, an thiampuipa Gylfi Sigurdsson goal hnih hmangin 2-1 in an hneh.  Everton midfielder Sigurdsson hian first half-ah goal hnih a khung a, Romania-in Alexandru Maxim penalty hmangin chhanglet mah se goal dang a luh belh lo. 

Iceland coach Erik Hamrén chuan, "Kan khelh danah ka lungawi hle. Hetiang inkhelah chuan thil te thama kan ngaih hi danglamna thlentu a ni a, goal kan khung hmasa te kha a pawimawh hle. Gylfi Sigurdsson a khel ṭha a, goal dang a khung belh lo kha a vanduai," tiin chak an phu thu a sawi.

Inkhel dangah Hungary-in Bulgaria 3-1 in an sawp a, mualneituin goal an khung hma hian Hungary-in goal thum an khung tawh avangin awlsam takin an chakah a ngaih theih. Puskás Aréna, Budapest-ah Hungary-in playoff final-ah Iceland an mikhual ang.

hi group F-ah Portugal, France leh Germany te nen an awm ho dawn a, Group of Death tih theih khawpin ram ṭha an awm khawm.

•    12 June - 12 July 2020 ah khelh tur ni mah se Covid-19 avangin a hun an sawn.

•    1 June - 11 July 2021 ah khelh a ni dawn. 

•    Inelna hi nakkum 2021 ni mah se a hming hi Euro 2020 a ni chhunzawm dawn.

•    European Championship inelna hi kum 60 tlinna tur a ni a, khawpui 12-ah khelh a ni dawn.

•    Ram 24 khel tur aṭangin ram 20 khel tur a hriat tawh.

•    Group A : Turkey, Italy, Wales & Switzerland

•    Group B : Denmark, Finland, Belgium & Russia

•    Group C : Netherlands, Ukraine, Austria & (Georgia/North Macedonia)

•    Group D : England, Croatia, Czech Republic & (Serbia/Scotland)

•    Group E : Spain, Sweden, Poland, (Northern Ireland/Slovakia)

•    Group F : Portugal, France, Germany & (Hungary/Iceland)