French Open : Rafael Nadal a lo kir dawn - a hmaah Zverev!

Tennis tournament ngaihhlut pali zinga mi French Open 2024 chu Pathianni tlai aṭangin main draw khelh ṭan a ni dawn, vawi 14 champion tawh Rafael Nadal a inlan dawn avangin ngaihven a hlawh zual ang.

Tun kar chhungin qualifying khelh a ni a, player langsar leh ranking sang zawkte erawhin tournament tenau leh hautak lo zawk lamah inbuatsaihna an nei thung; clay court tournament lian chu kan nghak chhuak leh ta a ni.

Nadal vs Zverev

French Open sawi chuan rilruah Nadal a lo lang nghal ṭhin, vawi 14 tehmeuh a champion tawhna a nih avangin a mak hran lo, season hmasa kha hliam vangin a khel thei lo a, kuminah dam tawh mah se ngai a la awh chiah lo.

Spanish star hi season khat aia rei a inkhel mumal ta lo, world number 276 a nih avangin match hmasa lamah seeded sang a hmachhawn thei tihna a ni a, seeded palina Alexander Zverev nen an intawng nghal ang.

Kar hmasa mai khan Zverev hian Italian Open nomawi a chawi a, tun hnaiah a khelh ṭhat ṭhin avangin a vawi khat nana Grand Slam title lak a beiseina pawh a sang hle, a hna erawh a hautak dawn takzet.

Player pahnih hi tun hmain an intawng fo tawh, chungh zingah chuan French Open 2022 semifinal pawh kha a tel, hemi ṭum hian German star Zverev hi a kerek a hliam, hun rei tak a chawlh phah hial a ni.

Tunah erawh Zverev hi a dam chiang tawh a, kum 27 mi niin kar tharah kum 38 tling mai tawh tur Nadal lakah chuan thahrui nei ṭha zawk tura ngaih a ni, clay court a nih avang erawh chuan sawi lawk a harsa.

A tawpna tur?

French Open 2023 an khelh dawn khan tennis ngainatute chuan Nadal chungchang an ngaihven ṭhup a, inelna neih dawnah Nadal hian chanchinbu mite kawmin, season thar (kumin) hi atana hun hnuhnung a nih a rin thu a sawi.

Tun season tournament a khelh ṭhenkhatah pawh thlahna hun an hmang deuh zel - Roland Garros an khel ṭan ang a, ngaihven hlawh leh mipui mit fukna ber a ni leh dawn chiang a, a khingpui tur tan pawh rilru kam khawp a ni ngei ang.

Kar hmasaa khelh zawh tak Italian Open aṭanga a tlak hnuah Nadal chuan, "100% ka pe thei ngei ang tih ring chungin French Open ka khel dawn," a ti a, hliam vangin inkhel mumal lo rei deuh mah se zuam sual theih tur a ni.

World number 1 Novak Djokovic chuan Nadal hi a hrechiang a, clay court inelna lian nena inzawmna an neih ṭhatzia pawh a hrechiang bawk, chuvangin kuminah pawh champion tura rinkai a ni tih a lo sawi ve tawh bawk.

Nadal leh Djokovic te vanglai hun a liam mek a, player chhuak thar ṭha an awm ta nual. Australian Open champion Jannik Sinner leh Carlos Alcaraz te chu champion thei tura buk rit zual zingah an tel bawk ang.

Swiatek a inpeih

Hmeichhe tennis world number 1 Iga Swiatek hian tun hnaiah Madrid Open leh Italian Open nomawi a chawi a, a inkhelh thiamna clay court season a hmang ṭha hle, a vawi li nan French Open nomawi pawh a chawi ngei a rinawm.

Polish nula hi seeded pakhatna pek a ni a, a match hmasa berah chuan qualifier kaltlanga invaw tling a hmachhawn ang. Swiatek chuan, "Ka taksa leh rilru a inpeih," tiin Paris khawpuia inelna hmachhawn a châk tawh thu a sawi.

French Open zawh hnu lawkah Wimbledon an khel zui dawn a, kumin hi Paris Olympic awm kum a ni bawk. Tennis player mai bakah infiammi dangte pawhin Olympic hi an nghahhlelh a ni.

Swiatek chuan, "Ngaih pawimawh ber leh a bik a awm thei lo, chutihrualin kumin chu Olympic atan rilru ka seng nasa. Tokyo-ah khan ka inlan tawh a, rilru a hah duhzia ka hrechiang, kuminah chuan ṭha zawka khelh ka tum," a ti.

Seoul Olympic Games 1988-ah khan Swiatek-i pa chu a lo inlan tawh a, a pa hniakhnung zuia an ram tihmingṭhatu nih a duh a, an ram tan gold medal hlawhchhuah chu tennis a khelh chhunga a thil chak zinga mi a ni tih a sawi bawk.