Leverkusen rilru natna thawi dam thei tur German Cup

25th May, 2024

Zanin dar 11:30 hian Olympiastadion Berlin-ah Bayer Leverkusen leh FC Kaiserslautern ten DFB Pokal final an khel dawn. Xabi Alonso enkawl Leverkusen hi kar liam ta thleng kha chuan vanram tlafualah an cheng a, mahse Europa League final-a Atalanta 3-0 ngawta an hneh loh avangin ben harhin an awm.

Leverkusen hian hneh loh nei loin Bundesliga nomawi an chawi a, hei vang hian season tira thil theih loa ngaih 'hneh loh nei loa season hman' chu thil theih ang hial ngaih a ni. Mahse, tunah chuan Leverkusen pawh tlawm thei an ni tih a lang tawh a, vanneihnain a daih seng ta bik lo. Alonso rilru hliam belhchhahtu tur chu hun pawimawh berah, Atalanta manager Gian Piero Gasperini-a'n ruahmanna (tactic) a nei ṭha zawk.

Alonso hi Real Madrid, Liverpool leh Bayern Munich te nen an sawizawm hman a, Leverkusen-a cham a thlang. Mahse, German Cup final-ah Leverkusen-in Bundesliga 2 club an hneh leh si loh chuan, match hnih hnu lekah Alonso hlutna hi nasa takin a tlahniam thei ang.

Chutihrualin Leverkusen hian Europa League final-a an theihnghilh a, German Cup final atana an insawrbing theih chuan champion ngei tura ngaih chu an ni. Final lut turin Leverkusen hian Bundesliga 2 club tho Fortuna Düsseldorf chu 4-0 in an sawp a, league table thlir chuan Dusseldorf hi pathumna an nih laiin Kaiserslautern hi 13-na an ni daih.

Zanin hian Italian club-in an dah ṭhat Florian Wirtz-a'n a theihna a lantir a ngai tawh dawn a, Alonso pawhin starting eleven a siksawi hret a nih pawhin a mak lo ang. Chutihrualin Atalanta laka che ṭha awmchhuna ngaih theih Jeremie Frimpong erawh bul a ṭan ngei a rinawm thung.

Leverkusen hi champion ngei tura ngaih ni mah se final-ah chuan engpawh a thleng thei a, Kaiserslautern hian an match hnuhnung berah Eintracht Braunschweig chu 5-0 in an sawp. Semifinal-a Saarbrucken an hneh ṭuma goal khungtu Marlon Ritter-a'n Braunschweig lakah hian hattrick a siam.

German Cup record en let chuan Kaiserslautern-in record an nei ṭha zawk. Kum 1990 leh 1996 khan Kaiserslautern hi DFB Pokal-ah hian an champion tawh a, Leverkusen erawh kum 1993-a an champion bak nomawi an la chawi leh lo.