Pathianni zanah IPL final

Cricket inelnaa pawisa tamna ber Indian Premier League final chu May 26, Pathianni zan dar 7:30 hian MA Chidambaram Stadium, Chennai-ah khelh a ni dawn. Kolkata Knight Riders-in league round-a pakhatna an nih hnuah qualifier 1-ah hnehna changing final an lut tawh a, he thuziah lai hian an khingpui tur a la hriat loh.

Nizan khan qualifier 2-ah Sunrisers Hyderabad leh Rajasthan Royals te an inkhel a, heta chak zawk hian final-ah KKR an hmachhawn ang. KKR hi vawi hnih champion tawh an ni a, kum 2014 hnuah an la an champion lo thung.

Rajasthan Royals leh Sunrisers Hyderabad te hian vawi khat ve ve nomawi an chawi tawh a, Royals hi inelna hmasa bera champion niin Sunrisers erawh kum 2016 khan an champion. Inkhel hi TV-ah chuan Star Sports 1 hmangin a en theih dawn a, online-ah chuan Jio Cinema aṭangin a thlawnin a en theih.

KKR hian IPL auction-ah nuai 2475-in Mitchel Starc an lakluh a, Australian bowler an ngam huai chhan chu semifinal-ah a lang. Chutihrualin Sunrisers pawhin nuai 2050 zetin Pat Cummins an lalut tih hriat a ṭha bawk.

Royal Challengers Bengaluru batter Virat Kohli-a'n tun ṭum inelnaah 741 runs a siam a, a team-te final thlenpui lo mah se Orange Cap chawimawina a dawn ngei a rinawm tawh. Wicket la hnem ber (Purple Cap) erawh Punjab Kings bowler Harshal Patel-a'n a dawn a rinawm, ani hian wicket 24 lain a hnaih bertu Jasprit Bumrah (Mumbai Indians) leh Varun Chakravarthy (KKR) ten wicket 20 ve ve an la.