Ranieri-a'n club enkawl chawlhsan dawn

Premier League-a Leicester City champion pui tawhtu manager Claudio Ranieri chuan Cagliari chu Serie A cham zel turin a chhanhim a, club enkawl a chawlhsan tur thu a puang. Italian club Cagliari hian match 38 aṭangin point 36 an hmu a, an hnuaia awm pahnih Forsinone (35 points) leh Udinese (34 pts) te match tawp bera an inhmachhawn dawn avangin an relegate thei tawh lo.

Kum 72 mi Ranieri chuan, "Club enkawl hna chu ka zo ta," tiin a sawi a, ram enkawl tur ṭha an awm chuan chawlh mai a la tum lo thung. May 23, Ningani zan khan Cagliari-in match hnuhnung berah Fiorentina an hmachhawn a, 3-2 in chak lo mah se inkhel entuten a chungah zahna an lantir.

Inkhelh ṭan hmain Cagliari ṭantute Ranieri hming lamin an au rual a, standing ovation an pe bawk. Amah chawimawina banner an keng nual a, chung zingah chuan, "Pa ropui chungah chatuan atan lawmthu kan sawi," tih te a awm hial.

Ranieri hian club ṭhahnem tak a enkawl tawh a, chung zingah chuan Napoli, Fiorentina, Valencia, Atletico Madrid, Chelsea, Juventus, Inter Milan, Roma, Monaco leh Greece te an tel. A chanchin an sawi apianga sawi lan reng tawh tur chu 2015/16 season-a Leicester City a champion pui kha a ni a, season ṭantirhah phei chuan betting odds-ah an champion theihna kha 5000/1 a ni hial. Mahse, khawvel rinna paih thlain Ranieri hoin Foxes an champion a, khawvelin Rome pachal hi an theihnghilh tawh lo ang.