Barca-in xavi an ban - a thlaktu tur Flick?

Season tawp a hnai zel a, player leh coach insawn thawm hriat tur a awm reng - June 14 aṭanga khelh ṭan tur Euro 2024 lam pawh kan hawi hleithei meuh lo chu a ni ber!

Sum leh pai lama tlachhe viau chungin Barcelona lam pawhin thawm an nei ve reng a, an thawm neih dan a mak ṭhin mai pawh a! Catalan club hian nimin khan an coach Xavi an ban thu an puang - Xavi hi Hansi Flick chuan a thlak dawn niin an sawi.

Xavi hian January khan Barcelona a chhuahsan tur thu a sawi a, mahse, club thuneitute lamin a tirah an pawm vek chungin an rilru an thlak a, Xavi hi cham turin an thlem.

Barca-in an club legend hi an hmin sauh sauh a, nimin khan an ban daih. Barca chuan, "Club tana coach a nihna anga a hnathawh avangin kan lawm," tiin Xavi hi an thlah.

A kaikuang

Xavi hian tun hnai khan an sum dinhmun a chhiat thu sawiin, an tan Real Madrid elpui chu thil hautak a nih thu a sawi - hei hian club president Joan Laporta chu a tilungawi lo hle nia sawi a ni a, Xavi ban a duh phah.

January-a Xavi-a'n a chhuah tur thu a sawi pawh khan Barca hian Flick hi an lo thlithlai tawh. Mahse, April khan Xavi hi Laporta leh club sporting director Deco te nen an inhmu a, Spanish coach hian cham turin thutlukna a siam.

Tunah an inban leh ta si a, Flick lam bawk an hawi leh ta. Barca thuneitute tana Xavi ui lohna turin Barca hian tun season-ah beisei an phak lo bawk.

Season hmasaah Xavi hoin league nomawi chawi mah se, tun season-ah pahnihna an ni dawn tih a chiang tawh a, an league match hnuhnung berah Real Madrid nen an chak ve ve a nih pawhin point 12-a champion team phak loin season an khar dawn.

Lungdumtu Flick

Flick hian Barca thuneitute hnenah a hmachhawp pawh a sawi tawh nia sawi a ni a, German coach hian Catalan club thuneitute lung a si viau niin an sawi - Laporta chuan 100% in Flick-a ruahmannate a thlawp niin an sawi!

Khawthlang media-te chuan Flick leh Barca hi a thuphungin an inrem tawh niin an tarlang hial a, match tawp ber khelh hmaa Xavi an ban ngam chhan pawh niin a lang - he thuziak i chhiar meuh chuan Flick hi coach thar turin an puang tawh hial mai thei.

Flick hian Bayern a enkawl lai khan a chet ṭhatpui hle. 2019-20 season-ah phei chuan treble champion a nihpui hial - chutihrual chuan Germany national team a enkawl hnuah beisei a phak lo a, ban a ni.

Germany hi August 2021 - September 2023 inkar a enkawl a, Germany coach a nihna anga a match hnuhnung ber chu friendly match-a 4-1 a Japan an ngam loh chu a nih avangin hmai uang lutuk thei chu a ni lo.

A tawpna chu

La Liga hi tun kartawpah khelh zawh a ni tawh dawn a, Pathianni zan dar 12:30-ah Barcelona hian Sevilla an lenchilh dawn a, tun season-a an match hnuhnung ber a ni tawh dawn.

Atletico Madrid chuan zanin dar 7:45 hian Real Sociedad an lenchilh dawn a, Atletico pawh hian palinaah season an khar dawn tih a chiang tawh. Champion chiang tawh Real Madrid chuan zanin dar 12:30 hian Real Betis an mikhual ang.

La Liga-ah hian thil a chiang vek tawh a, hei vang hian a hlut tur angin season tawpna match a hlu tawk lo. Real an champion a, Barcelona, Girona leh Atletico Madrid ten Champions League an khel dawn.

Athletic Bilbao leh Real Sociedad chuan Europa League group stage an khel dawn chiang tawh a, Real Betis-in Europa Conference League playoff round an khel bawk ang.