Luangmualin final an lut nawn

Ather Pro Volleyball League 2024 hmeichhe inelna lamah Luangmual chuan final an lut. Ningani zan semifinal inkhel hmuhnawm takah Luangmual hian an khingpui Bungkawn chu 25-21, 15-25, 19-25, 25-15, 15-9 (3-2) in an hneh.

LPS Arena, Falkland-ah inkhel a hmuhnawm a, league round lama intawng tawh an nih avangin an fimkhur tawm hle. Hun pawimawh laia che fuh thei zawk Luangmual an dingchang, nizan khan Diakkawn leh Serkawn ten semifinal pakhat zawk an khel, a chak zawk leh Luangmual nen May 30, Ningani zanah nomawi an inchuh ang.

Luangmual tan point 14 neitu Lalhriatpuii a thawhhlawk hle a, an chakna hnar niin Kuriz Player of the Match atan thlan a ni a; Lalramliani, Lalbiakngheti, Remlalnghaki leh B. Tlangmawii ten an thlawp ṭha hle bawk a, nomawi humhim turin theihna an nei.

Bungkawn hian F. Lalparmawii an hmachhuan leh a, point 17 neiin a che ṭha viau. Set khatna an hloh hnuah a zawna set hnih an lak theih chhan pawh a ni, mahse a pawimawh ber set nganaah an zuih a, an tum ram an thleng zo ta lo.