September-ah UEFA president thar

Europe-a football thuneitu sang ber UEFA chuan president nila Michel Platini-a'n hrem a nih vanga banna a thehluh hnuah president thar thlanna chu September 14-ah neih a nih tur thu an puang.

Kum 60-a upa French pachal hian eiruk thubuai vanga hrem a nihna ngaihtuah nawn tura Court of Arbitration for Sport (CAS)-a a ngenna chu a hlawhtlinpui lo a, kum ruk hrem tura tih kha kum li chhung hrem tura an tih tlem sak chauh avangin May 9 khan a nihna aṭanga banna a thehlut a ni.

Thamna sum pound maktaduai 1.3 lai Sepp Blatter hnen aṭanga dawng anga an puh Michel Platini thlak tur hian Dutch Football Association hotupa leh UEFA vice president ni bawk Michael van Praag chuan din a tum thu a sawi tawh a, July 20 thleng hming thehluh theih a ni ang.

Van Praag bakah hian Slovenian federation president Aleksander Ceferin leh Spain lam chhuak UEFA vice-president leh president dinhmun luah lailawktu Angel Maria Villar-te hming lamrik a ni bawk.

UEFA secretary general lai-lawk Theodore Theodoridis chuan Athens, Greece-a ram 55 an in-hmuh--khawm hunah president thar hi thlan a nih tur thu a sawi a, president thar hian Platini-a hun neih March 2019 thleng president hna hi an chelh ang a, FIFA vice president a ni nghal bawk dawn a ni.