Kohli an dang thei lo

Nilaini zan Indian Premier League-ah inkhel pakhat chiah a awm a, Royal Challengers Bangalore inkhelh zan a nih miau avangin ṭum dang ang bawka player langsar chu Virat Kohli a ni a, Kings XI Punjab lakah a team chu run 82-in hnehna a chanpui.

Ruahsurin inkhel a tihbuai vanga DL method an hmanna inkhelah hian Bangalore an bat hmasa zawk a, over 15-ah run 211 siam hmanin batsman pathum chiah an hloh. RCB tan Virat Kohli chuan player danglam bik a nihzia a pholang nawn a, Indian batsman hian ball 50 a hmachhawnah run 113 a vaw chhuak a, ball 32-a run 73 vaw chhuaktu Chris Gayle chuan a pui ṭha viau bawk.

Kings XI Punjab tan an target a tam hret a, over 14-ah run 120 siama mi pakua hlohin an tlawm ta a ni. Punjab tana run siam hnem ber Wriddhiman Saha chuan run 24 bak a tlin lo! Bangalore club tan bowler zingah Yuzvendra Chahal a langsar a, Harya-na spin bowler hian over thum a vawmah run 25 pein wicket li a la thei a ni.

Zanin IPL-ah inkhel pakhat a awm dawn a, zan dar 8:00 hian Delhi Daredevils leh Sunrisers Hyderabad-te an inhma-chhawn ang.