Reds an vul rei lo - ropuia ngamtu Sevilla

Europa League final lut turin Liverpool-in club ṭha Manchester United leh Borussia Dortmund an hneh thei a, Sevilla erawh an hneh lo chiang hle!

Nilaini zan Europa League final-ah Liverpool hi Spanish club Sevilla chuan 3-1 in hneh a, a kum zawna a vawi thumna atan Europa Cup-ah Spanish club Sevilla hi an champion.

Season tharah Liverpool-in Champions League an khel dawn lo a, Europa League-a sa zawna vawi thum champion hmasa ber Sevilla erawh Champions League-ah kan hmu dawn. Basel khawpuiah Liverpool fans an ṭap a, Sevilla fan-te hlimin an zai.

Beiseina

Season thara Champions League khelh tum Liverpool beiseina chhi nung turin Daniel Sturridge chuan minute 35-naah goal 'class' bik a khung a, Liverpool-in 1-0 in hma an hruai. Goal dang lut loa chawlhlawk hman a ni.

Second half ṭan aṭanga second 17-na lekah Sevilla-in Kevin Gameiro hmangin an si phurh an sut nghal a, an inrin hmaa an si phurh suttirtu Liverpool an tho leh tawh lo - Coke-a'n goal hnih dang a khung chhunzawm a, Liverpool an mualpho.

Liverpool-in League Cup final-ah Manchester City an hneh loh avangin tun season-a Cup final pahnih an chak lo ve ve a, Reds manager Jurgen Klopp-a'n Cup final a luh hnuhnung pangaah a team chakpui a nei lo!

Bayern Munich hnuai chiaha vawi tam lo awm tawh German manager hian inkhelh hmain, "Silver medal ka ngah tawh lutuk a, tunah chuan gold-a thlak a hun tawh a ni," tiin sawi mah se silver medal bawk a dawng leh ta.

A pawi

Europa League champion-in season tharah Champions League an khelh dawn miau avangin league lama pariatna ni chunga season khar Reds tan Sevilla hneh loh hi a pawizia a lang dawn chauh - an nipui bazar a nghawng thei.

Liverpool, Klopp leh Champions League inkawp vek hi han ngaihtuah la - world class player tan chuan chil tiput tham a ni. Mahse, Champions League chu sawi loh Europa Cup pawh an khelh phak dawn tak loh avangin Liverpool hian nipui transfer-ah an mit chak zawng apiang an thlung thei dawn lo tihna a ni a, season tharah 'world class' player tel lo chuan a harsa lehzual ang.

Tlo lo

Nilaini zan inkhela lang chiang tak chu Liverpool an tlo lo tih hi a ni. Jurgen Klopp hi a hming lansarh ang aiin manager ṭha a lo ni tak tak lo nge, a player-te zawk hian German coach thluak ang hian an khel chhuak zo lo zawk?

Alberto Moreno a chesual leh a, Europa League semifinal first leg-a Villarreal goal khungna kawnga chesual defender hi a club hlui a hmachhawn zanah chesual nawnin Kevin Gameiro goal khung hi amah vanga zara lut a ni a, goal venhim ngaihthahin tlan chhuah nuam a ti mah mah niin a lang.

Reds player zingah Philippe Coutinho leh Roberto Firmino-te thiam hle mah se Sevilla lakah erawh Brazilian player pahnih hi hmuh tur an awm meuh lo - Spanish ball thiam bulah an langsar phak lo.

Sturridge-a 'class'

Minute 35-naa goal khungtu Sturridge-a'n 'striker class' tak a nihzia a pholang nawn a, penalty area-ah mawi taka ball a lak kual hnua a ke vei lama a pet goal hi striker naran tan tih chi a ni lo.

Tun hnaia English striker ṭha ber pawl Sturridge hi a inhliam chhungin Harry Kane leh Jamie Vardy-ten a hmun ruak lo luah hman mah se a in-fit ṭhat phawt chuan England manager Roy Hodgson lutihai turin a ṭha tawk a, captain Wayne Rooney-a tan awm mai mai a chi loh bawk ang.

Referee ṭha leh vanduaina

Coke-a goal hnihnaah assistant referee-in offside phar mah se referee-in a hmuh chian miau avangin a thuneihna hmangin linesman hmuh dan a pawm sak lo.

Goal khungtu Coke ball petu hi Liverpool midfielder Adam Lallana a nih tlat avangin Spanish right back hi a offside lo a, referee thutlukna hi a dik a ni.

Reds tan first half-a Dejan Lovren goal khung chu Daniel Sturridge offside vangin pawm a ni lo a, Liverpool an vanduai.

First half-ah Roberto Firmino-a'n Daniel Carrico bum a tumna lamah penalty area-ah chiang takin Portuguese defender hian a kutin ball beng mah se referee-in a ham tlat lo a, penalty pe se chuan inkhel thlak danglam thei tur a nih avangin Liverpool fan-ten an sawi rei ang.

Reds hian penalty area-ah vawi hnih dang handball vangin penalty hmuhna remchang nei mah se hei pawh referee-in a ham tlat lo - tihluih a nih loh avangin penalty pek leh pek loh hi referee thutluknaa innghat a tih theih rualin penalty area-a handball hi tun thlenga football dan hre chiang intite pawh an inhnialna a la ni.

A tawp khaikhawmna erawh Liverpool-in bul ṭan ṭha mah se second half-ah beisei an phak lo a, Europa League-ah champion phu zawk Sevilla-in nomawi an chawi.

Players thukhawchang

Liverpool captain James Milner chuan, "Second half-ah khan kan khel ṭha lo em em a, a lungawi thlak loh a ni. Ka lungawi lohna belhchhahtu erawh kan theihna anga kan khel chhuak lo kha a ni a, holam taka goal kan chhuah hnuah kan tho leh tawh lo," tiin a lungawi lo hle.

Manchester City chhuahsana Liverpool pantu Milner chuan, "Goal thumnaah referee leh linesman ngaihdan a in ang lo a, sawisel erawh ka tum lo. Referee thutlukna avang chak lo kan ni lo a, game pawimawhah kan theihna kan pholan loh vanga chak lo kan ni," tiin referee a dem lo.

Sevilla defender Daniel Carrico chuan, "Season thum chhung kan champion a, he inelna hi kan ta ang mai a ni. Liverpool khan first half ṭha tak khel mah se manager-in game kan thlak a ngaih thu a sawi a, awlsam taka kan si phurh kan sut hnuah kha chuan inkhel kha kan ta a ni tawh," a ti.

Carrico chuan kum 2007-a boral ta Sevilla defender hlui Antonio Puerta tan an nomawi chu an hlan thu sawiin, an ṭhianpa thlarau chu an hnenah a awm reng thu a sawi.

Inkhel chhehvel

¬ UEFA Cup/Europa League inelna hnuhnung 11-ah Sevilla-in nomawi panga an hawn!

¬ Daniel Sturridge chuan Liverpool tana inkhel bul a ṭan hnuhnung pakuaah goal ruk a khung leh tawh.

¬ Kevin Gameiro-a'n Europa League-a a match hnuhnung parukah goal sarih a khung

¬ Coke-a tan a goal hnih khung hi Europa League-a match 24 a khelh hnaua a goal khung lehna hmasa ber a ni.

¬ Sevilla-in Europa League nomawi vawi thum an chawina final pathumah Daniel Carrico leh Vitolo-te chuan first eleven an chang vek.