Louis Van Gaal-a rilru a buai

Manchester United mana-ger Louis van Gaal chuan FA Cup final atana player thlan harsa a tih thu a sawi chhuak. Red Devils hian Inrinni zan dar 10:00 hian Wembley Stadium-ah Crystal Palace nen FA Cup final an khel dawn.

Thawhlehni zan khan Manchester United-in an mual Old Trafford-ah Bournemouth chu 3-1 in an hneh a, inkhelh banah FA Cup final a thlir lawk nghal.

Dutch manager Van Gaal chuan, "Player zawng zawngin FA Cup final an khelh châk vek avangin thutlukna siam a harsa dawn hle. First team-ah thlan theih turin player 27 an awm a, chung aṭang chuan player 18 thlan chhuah a ngai. Chumi zawh chuan starting eleven thlan leh tur a ni a, a awlsam lo a ni," tiin thlan tur an tam vanga a rilru a buai thu a sawi.

Cherries an hneh ṭumin captain Wayne Rooney chuan goal hmahruai a khung a, club-in man of the match-ah athlang bawk. England captain hi an match hnuhnung berah midfield-ah a khel a, Rooney hian a upat ve zel avangin season tharah chuan midfield-a khelh a ṭul tur thu a sawi nghe nghe.

Kum 64-a upa Van Gaal chuan, "Central midfield-a khelh hi nuam a ti a, midfield aṭangin inkhel a thunun thei tih a lantir bawk. Rooney hian midfield-ah hmabak eng tak a nei a ni," tiin England striker chu midfield-a a ṭhat zawk tawh thu a sawi.

Rooney aia tlarhmaa hriam tawh zawk chu kum 18-a upa Marcus Rashford a ni a, player 26 telna England squad-a koh Rashford hian Euro 2016 khel turin FA Cup final-a chetṭhat a mamawh.

Dutch manager Van Gaal chuan, "Rashford-a hnathawh hi kum 18 leka upa tih atan chuan a ropui thlawt a ni. Tun hnai match zawng zawng (Norwich tiam loin) a khel a, theihna a ngah avangin hun tawp hma minute 15 bak chu chawlh ka pe thei meuh lo. Final-ah pawh hian a theihna a lantir leh ngei ka beisei," tiin Crystal Palace hmachhawn turin Rashford a khelh tur thu a sawi.

Palace lam pawhin hun ṭha bawhpelh an tum lo. French midfielder Johan Cabaye chuan, "Steve Parish (club neitu) hian club ṭhan zel a duh a, FA Cup champion hi chumi kawng zawhna chu a ni. Champion ngei tumin player-te nitin kan thawkrim a, Palace tan inelna lian thama nomawi chawi hmasa ber nih kan duh a ni," tiin a sawi.

Kum 110-a upa Palace hian English top flight-ah nomawi an la chawi lo a, 1990-91 sea-son khan pathumna niin an thlen san ber ṭum a ni. FA Cup-ah hian 1990 khan final an lo thleng tawh a, Manchester United hneh loin pahnihna an ni.