Fed Cup champion ngei kan tum - Jeje

Mohun Bagan-in I League-ah Aizawl FC an hneh loh hnuah an chesual zui a, Bengaluru FC-in an champion nomawi an chhuhsak. Mariners hian nomawi tel loa season khar an tum lo a, Federation Cup-ah Aizawl FC lakah phuba lak an tum.

Mariners striker Jeje Lalpekhlua chuan, "I League-a kan champion tak loah chuan Mohun Bagan tan chuan Federation Cup hi a pawimawh a, chetsual a thiang lo. Club hruaitute pawhin nomawi chawi ngei turin min fuih a ni. Ka tan chuan Fed Cup hi a pawimawh lehzual a, tun hi final ka vawi khat thlenna niin champion ngei ka duh," tiin Vanglaini palai a hrilh.

Hnahthial tlangval Jeje hian club football inelna lian pahnih I League leh Indian Super League-ah champion nomawi a chawi tawh a, Federation Cup hi a lungthu kimna tur a ni.

Goal aia champion a dah pawimawh thu sawiin Jeje chuan, "Final-a goal khung a châkawm rualin chak si loh chuan awmzia a awm lo. Ka duh ber chu champion a ni a, goal chu a nawmna tifamkimtu chauh a ni," a ti.

Mohun Bagan striker Jeje hian goal ruk a khung tawh avangin top scorer tura rinkai a ni a, amah hnaih bertu Aizawl FC striker Joel Sunday-a'n goal li a khung tawh.

Nizan khan Federation Cup-a champion ngun ber Bagan hian final khelhna tur Guwahati an thleng.