Banega-a'n Inter zawm dawn

Inter Milan chuan Ever Banega la lut turin Sevilla midfielder nen inremna an nei tawh. Serie A club hi Manchester City midfielder Yaya Toure nen sawi zawm ni mah se Italian club hian an pha a, Banega an lakluh tur thu an puang thung.

Kum 27-a upa Banega hi Valencia-a hming a chher hnuin 2014 khan Sevilla a zawm a, season hnih chhungin Europa League nomawi a chawi pui ve ve. Nilaini zana Liverpool an hneh ṭumin Banega hi injury time-ah Sebastian Cristoforo-a'n a rawn thlak a, Europa League final kha Spanish club tana a match hnuhnung berah a ngaih theih.

Season tawp rual hian Sevilla-a Banega contract hi a zo dawn a, amaherawhchu Argentina midfielder hian a hma lam hun a sawi chiang duh lo.

Banega chuan, "Sevilla chungah ka lawm takzet a, kum thum nomawi kan chawina a ni a, supporter-te nena kan thawh hona ṭhat vang a ni. First half kha a awlsam lo a, second half-ah erawh kan khel ṭha takzet. Inter chungchang hi ka sawi duh lo a, tunah chuan Sevilla chiah sawi ka duh," tiin a chhuah tur thu a la sawi duh lo.