Real Madrid tan Pogba a khel châk

Manchester United mid-fielder Paul Pogba chuan engtik niah emaw Real Madrid tana khelh a châk thu a sawi.

September thla tir khan Pogba hi Covid-19 a positive avangin France tan a inlan thei lo a, tun ṭumah hian an ram team-ah koh niin khelmuala a chet dan aiin a thusawi sawi zui a hlawh zawk.

Kum 27 mi Pogba chuan, "Player zawng zawngin Real Madrid tan an khel châk ang, ka tan pawh duhthusam a ni. Engtik niah emaw chuan ka la khel mahna," tiin Spanish club lian tana khelh châk thu a sawi chhuak.

Pogba hi Real Madrid nen sawi zawm an ni tawh ṭhin a, Los Blancos manager hi Zinedine Zidane a nih bawk avangin French midfielder hian Real jersey hi a la hak ngei ringtu an tam hle.

FIFA World Cup-a France champion puitu Pogba contract neih lai hi tun season tawpah zo dawn a, chutihrualin United-in cham tura an duh chuan kum 2022 thleng an pawtsei thei thung. 

Pogba chuan, "Tumahin engmah min la hrilh lo. Ed Woodward nen kan la inbe lo a, contract thar chungchang kan la sawi lo. Tunah chuan Manchester United player ka ni a, ngai awh leh turin theihtawp ka chhuah mek," tiin United tana theihtawp a chhuah tur thu a sawi.

Les Bleus hian an match hnuhnung berah Ukraine 7-1 in an sawp a, Pogba hi bench aṭangin a lut. Pathianni zan dar 12:15-ah France hian Portugal an hmachhawn dawn a, Nations League group A3 hmahruaitu inchuhna a ni ang. Didier Deschamps-a hote hian Sweden (1-0) leh Croatia (4-2) te an hneh ve ve.

Cristiano Ronaldo telna Portugal pawh hian Croatia (4-1) leh Sweden (2-0) hi an hneh ve ve a, France aiin an chakna a tam zawk. Pathianni zanah Europe ram ṭha pahnih hi an inhnehtawk a nih chuan Portugal hi goal difference hmangin hmahruaitu an ni chhunzawm ang.