Zaninah FA Cup final Crystal Palace vs Manchester United
Khawvela football inelna upa ber FA Cup-ah Manchester United-in 2004 hnuah nomawi an chawi tawh lo a, Sir Alex Ferguson-a'n ropui takin Premier League khar mah se knockout inelnaah erawh an champion loh rei avangin nomawi chawi kawngah Arsene Wenger-a ho Arsenal-in an khum tawh.
Zanin dar 10:00 hian Wembley Stadium-ah Louis van Gaal hoin United-in Crystal Palace an hmachhawn dawn a, nomawi an chawi thei a nih chuan Gunners nomawi chawi zat vawi 12 an chawi ang a, Ferguson-a awm loh hnua an nomawi chawi hmasa ber a ni thei bawk ang. Inkhel hi AXN-ah an pekchhuah beisei a ni.
Zaha a dam
Crystal Palace manager Alan Pardew chuan, "Sir Alex hian tun thlengin Wilfried Zaha hi United tana khelh tlakah a ngai. Wilfried hian a chakna leh thiamna hmangin nuam ti takin player a bum thei a, a ṭhatna tak tak hi pholan a la ni lo. United-ah a duh anga a hlawhtlin loh avangin ngai awh turin hun a duh a, final-ah hian Palace tan leh ama tan ṭha taka a khelh theih ka ring," tiin a player a fak.
Zaha hian January 2013 khan pound maktaduai 15-in Palace aṭangin United hi a zawm a, khelhna hmun a chan tam loh avangin 2015 khan Eagles pound maktaduai 3 bawr velin an la let leh. Malpui hliam vanga match thum awl tawh Zaha hi a club hlui hmachhawn thei turin a dam a, winger Bakary Sako chhawr theih tur zingah a awm tawh bawk. Pardew tan midfielder Joe Ledley chiah chu final-a thlan theih loh a ni.
United tan Bournemouth an hneh ṭuma inlan lo Matteo Darmian, Morgan Schneiderlin leh Marcos Rojo te an rawn let. French midfielder Schneiderlin hi hrem hmang zo Marouane Fellaini nen khelhna hmun an inchuh dawn. Bastian Schweinsteiger leh Luke Shaw te an khel thei lo chiang a, Adnan Januzaj leh Timothy Fonsu-Mensah te an dam hman hmel loh bawk.
Thlir bik tlak Rashford
Final-ah hian Marcus Rashford hi kum 18 leh ni 203 a upa a ni dawn a, goal a khung thei a nih chuan Norman Whiteside (Kum 18 leh ni 19) dawta FA Cup final-a goal khung thei naupang ber a ni ang. Northern Ireland striker hlui Whiteside hian United tan FA Cup final-ah goal a khung a, nomawi a chawi pui bawk.
Rashford hian kumin February 25 aṭangin United tan khel ṭan chauh mah se league match 11-ah goal 5 a khung thei a, inelna dang nen chuan United kawr hain match 17 khel thawin goal 8 a khung tawh. Season
ṭantirha mipui hriat loh kha England Euro 2016 premliminary squad-ah telh a ni a, FA Cup final-ah goal a khung a nih chuan paih mai a harsa tawh ang.
Manager thukhawchang
Crystal Palace manager Alan Pardew chuan, "Ball an chang hnem ṭhin avangin kan dawhtheih a ṭul dawn a ni. Team ṭha lo zawk kan nih avangin chak kan duh zawk a ngai a, kan thawhrim a ṭul. United aiin khelmualah
ṭhat zawkna kan nei a, kan ṭhatna lai kan hman thiam a ṭul ang," tiin final atana inbuatsaih ṭhat thu a sawi.
Manchester United manager Louis van Gaal chuan, "Mipui rilru hmin thlap theih nana khelh ṭhat hi kan tihtur chu a ni. Amah-erawhchu kan khingpuite khelh dan kha a pawimawh tel a, goal khung tuma an rawn khelh ve bawk chuan inkhel hmuhnawm tak inhmu ang. Chiang taka chak kan duh a, goal mawi hmuh kan duh, chutihrualin duh dana a kal vek theih loh avangin 1-0 a kan chak pawhin kan lungawi ang. Chak hi a pawimawh ber a, a bak hi chu behbawm chauh a ni," tiin attacking football an khel tawk lo nia an sawi ṭhin chu a rawn sawifiah.
United player zingah Chelsea tana champion tawh Juan Mata chiah FA Cup nomawi chawi tawh a awm. Crystal Palace coach hian 1990 final-ah player a nih laiin final-ah United an hneh lo a, 2006 final-ah West Ham enkawlin Liverpool lakah vanduai takin an chak lo. FA Cup final hian chanchin a ngah a, tun ṭum hian sawi zawm theih a ngah avangin a ngaihnawmna belhchhahtu tur a tam hle.