Cavaliers dan theih an ni lo

Nimin zing khan NBA Eastern Conference Finals Game 2 khelh a ni a, Cleveland Cavaliers chuan Toronto Raptors lakah 108-89 a hnehna changin series-ah 2-0 in hma an hruai. Cavaliers hi playoff-ah hian an khel ṭha tluang tak zet a, match 10 an khelh tawhah hnehna an chang fai vek. Pathianni zing dar 6:00-ah Game 3 an khel leh ang.

Quicken Loans Are-na-a inkhelah LeBron James-a'n a ropui zia a lantir nawn leh a, NBA playoff bikah triple-double a vawi 15 neihna ni turin point 23 a score bakah rebound leh assists vawi 11 ve ve a nei bawk a, James hian NBA playoff-ah point 5,255 a score tling ta chiah nghe nghe a ni.

Power forward James hian playoff bikah chuan Michael Jordan (5,987), Abdul-Jabbar (5,762) leh Kobe Bryant (5,640) te chiah tluk loh a nei tawh a, NBA chanchina player ropui ber berte huangah a hming hi ziah luh a ni tawh dawn a, a chung berah a awm chho a nih pawhin a mak hran lo ang.

Kum 31-a upa James chuan, "A chang hi chuan ka naupan laia ka lo suangtuah tawhna kha ka ngaihtuah let fo ṭhin. Basketball player ropui tak takte inkhel ka enin anni anga khelh ve ka châk ṭhin hle. Player ropui tak takte huanga ka hming a chuang ve mai tur hian mi ti lawm a, a pawimawh ber erawh kan team kan chak hi a ni," tiin a sawi.