Sumin Benitez hmalam hun hril dawn

Newcastle United manager Rafael Benitez hmalam hun a chiang lo chhunzawm zel a, Spanish manager hian St.James Park-ah a cham zel dawn a nih chuan transfer bazar-ah sum tam zawk hman a phut nia sawi a ni.

Liverpool boss hlui hian March thla khan Magpies hi a zawm a, relegation aṭangin chhanhim thei lo mah se Spanish manager hi Newcastle fan-te chuan an hnena cham zel turin an match hnuhnung bera Tottenham Hotspurs 5-1 a an sawp ṭumin an au rual hial.

Benitez hian Magpies a zawm tirhin Premier League-ah an inhamtang lo a nih chuan chhuah theihna dan a ziak tel a, mah se tun hnaiah Newcastle hotuten an hnena cham tura an sawm avangin inbiakna kalpui mek a ni.

Real Madrid boss hlui hian, "Ka thinlung chuan he hmuna cham turin min hrilh a, mah se ka thluak chuan thil awmdan chiang taka zirchiang turin min hrilh thung," tiin a lo sawi tawh.