FA Cup final leh thawnthu hlui chu...
Louis van Gaal-a'n kum khat contract a la nei a, Dutch manager hi kum 64-a upa a nih tawh avangin football khawvelah hun tam a nei tawh lo. Club ropui Ajax, Barcelona, Bayern Munich bakah Netherlands hlawhtling taka lo enkawl tawhtu manager hian a contract a hman zawh hmaa banna lehkha hmuh hi a hreh tih amah pawhin a pha lo.
Sir Alex Ferguson-a awm loh hnuah Manchester United FC-in champion zia an hloh tawh ni berin a lang a, tun season-ah Champions League group stage an paltlang loh bakah Europa League-ah an hmelma Liverpool-in an pet chhuak. Premier League-ah relegate tura rin Leicester City an champion laiin champion ngun ber United-in pangana chauh an hauh pha a, Champions League an khel pha dawn lo.
League Cup-ah Van Gaal-a hoten Round 4 chiah an thleng pha a, an hneh loh chu Championship club Middlesbrough a ni. Manchester United-in an result chhuan tur an neih loh ang bawkin an khelh danin supporter mai bakah player hluite lung a dum zo lo. Season thara Champions League khel lo tur Red Devils tan FA Cup hi an mualpho lutuk tur hliah khuhna a ni thei a, Van Gaal-a tan ban pumpelhna a ni thei bawk.
Min hrilh rawh 'thawnthu hlui'
Manchester United enkawl tawh zinga ropui ber ang hiala chhal theih Sir Alex Ferguson-a'n bul a ṭan ṭha lo. November 6, 1986 khan Scottish manager chuan United a zawm a, hetih hunlai hian English league sang berah hian club 22 an awm a, Ferguson-a'n a enkawl ṭantirh hian 21-na an ni.
United player zingah zu vang buai an tam a, chung zingah chuan player ṭha Norman Whiteside, Paul McGrath leh Bryan Robson te pawh an tel. An fitness ṭha lo siam ṭhat chu Ferguson-a hna hmasa a ni a, rorum taka enkawl nghalin season tawpah chuan 11-na an ni pha hial.
1987-88 season-ah Alex Fergu-son-a hoin season bul an ṭan a, hmasawnna nasa tak langin pahnihna ni pha hial mah se an chungah Liverpool an awm. Nomawi beiseina a sang chho a, amaherawhchu 1989-90 season-ah hian Alex-a hote an che ṭha lo. United hi vawi sarih an chak lo zawn hnuah FA Cup third round-ah Nottingham Forest khelmualah an zin a, chak lo se chuan Scottish manager hi a hna chan tura ngaih a ni. English striker Mark Robbins goal hmangin United an chak hram a, goal awmchhun hi fourth round thlenna leh Ferguson-a hna chhanhimtu nia sawi a ni.
Robbins-a goal chungchang sawiin Ferguson chuan, "Forest lama goal kha a pawimawh takzet a, kha goal kha lut ta lo se eng nge ka chunga thleng tur a hriat loh. Amaherawhchu ka hna chhanhimtuah erawh ka ngai lo. Football-a thil thleng tur a hriat lawk theih lo a, chutihrualin Bobby Robson khan club innghahna kha a hre chiang em em a, min ban a duh lo ang," tiin a hna chhanhimtu a nih loh thu a sawi thung.
Alex Ferguson-a hnuaia season thumnaah hian United hi 11-naah an awm a, dinhmun ṭha ni lo mah se FA Cup an champion zui avangin Scottish manager-in a hna a chelh zel. 1990 FA Cup final-ah hian United-in Crystal Palace an hmachhawn a, 3-3 a an inhnehtawk hnuah replay khelin Lee Martin goal hmangin United an chak. English left back Martin hian goal hi khung ta lo se United hian tun hun hi an thleng kher lo ang - a chhan chu Scottish manager Alex hi a ropui hmaa ban theih a nih avangin.
United player hlui Martin chuan, "Ferguson-a hna chhanhimtuah mi zawng zawngin Nottingham lama Robbins-a goal khung kha an ngai. Kei, ka ngaih danah chuan Robbins-a goal chu a ni chiang a, amaherawhchu semifinal-a Oldham Athletic laka chakna goal a khung zawk kha a ni," tiin a sawi. United hian FA Cup semifinal-ah hian Oldham Athletic chu extra time zawhah 3-3 in an draw a, replay-ah extra time khelh leh ngaiin Robbins-a goal hmangin 2-1 in an chak.
Kum 26 liam taa Palace midfielder pawimawh chu Alan Pardew a ni a, ani hi tun ṭuma Palace manager a ni. FA champion United team leh tuna Van Gaal-a team-te danglam daih tawh mah se Dutch manager hi Alex Ferguson-a kalphung nen sawi zawm theih dan a awm - player naupang an ngai pawimawh.
Final-a chakna goal khungtu Robbins chuan, "Sir Alex khan naupang hmangin team a din a, Van Gaal hian naupang chungah rinna a nghat bawk. Tunah chuan United fan ka ni a, naupang panga paruk vel ṭha chho thei tur ka hmu hi ka lawm. Tun season-ah United tan player ṭhahnem takin bul an ṭan a, heng naupang te hian kum khat dang chu Van Gaal hnuaiah la khel thei se ka ti," tiin FA Cup nomawi hian Van Gaal-a hna chhan thei se a tih thu a sawi.
FA Cup final hi Alex Ferguson-a'n kum 26 liam ta khan lo hmang ṭangkai tawhin inelna lianthama nomawi hmasa ber a chawina a ni. FA Cup nomawi a chawi hnu kum thumnaah Scottish manager hnuaiah Premier League nomawi hmasa ber an chawi a, Sir Alex-a hlawhtlin chhoh dan erawh sawi zui zel ngai loin khawvelin an hria.
Louis van Gaal tan erawh FA Cup nomawi hi hna chelh zui theihna a ni lo thei a, a chhan chu hman lai angin tunah chuan club tinin dawhtheihna an tlachham tawh. Sir Alex Ferguson thlaktu David Moyes-a'n kum khat pawh United-ah hun a nei thei lo a, Van Gaal hian kum hnih aia tam a daih ang em tih hi hunin a hril ang.
Fergie Vs Van Gaal
Fergie 1990
Man Utd record (all comps)
Played 49
Chak 20
Draws 17
Chak lo 12
League Pos 13th
Nomawi FA Cup
LVG 2016
Man Utd record (all comps)
Played 58
Chak 30
Draws 14
Chak lo 14
League Pos 5th
Nomawi - ?