Bayern Munich vs Borussia Dortmund

Zanin dar 11:30 hian Olym-piastadion, Berlin-ah German Cup final khelh tur a ni a, Bundesliga champion Bayern Munich leh an hnuai chiaha awm Borussia Dortmund te an inkhel dawn.

Pep Guardiola-a'n Germany-ah season thum hun a hman chhungin Bundesliga-ah a champion pui vek a, Champions League-ah erawh semifinal bak a hruai thleng lo thung. Season thara Manchester City manager ni tawh tur Guardiola hian a hun tawp ber hi nomawi nena hman a duh ngei dawn. Mahse Thomas Tuchel-a'n league lama a tluk loh manager hi Cup inelnaah hneh let a tum ngei dawn avangin inkhel hmuhnawm bik a ni ang.

Team ṭha pahnih

Barcelona manager hlui Guardiola-a'n a enkawl hma pawhin Bayern Munich hi khawvela club ṭha berte zinga mi an ni sa a, Spanish manager-in a enkawl hnuah pawh an ropuina an chhawm nung zel. Season hmasa leh tun season hman zawh takah khan Bundesliga-ah goal 80 ve ve an khung a, season hmasa khan goal 18 chiah chhuahin tun season-ah erawh goal 17 chauh chhuahin league-a goal chhuah tlem ber record thar an siam nghe nghe.

Hetihlai hian Dortmund pawh an nep bik lo, point 78 hmuin an club chanchina season khat chhunga an point hmuh tam ber ṭum an tawng. Champion nomawi chawi phak lo mah se goal 82 an khung avangin Bayern aiin goal hmaah an hriam zawk tih a chiang, team ṭha lo zawk anga dah theih ngawt an ni lo ang.

Hummels hi?

Zanina player ngaihven hlawh ber leh mipui mit fukna ber tur chu Mats Hummels a ni lo thei lo ang. Germany international hian Robert Lewandowski leh Mario Gotze te hnung zuiin Dortmund chhuahsanin season tharah chuan Bayern kawr a ha tawh dawn a, zanin hi a club hlui ni tawh mai tur Dortmund kawr a hak hnuhnun ber ṭum a ni tawh dawn.

Khawvela fan nei ṭha ber ang hial pawha an sawi ṭhin Dortmund hian an defender kalchhuak tur hi an ui em avangin an au nawmnah a nih pawhin a mak lo ang a, captain ṭha leh zah phu a nih avanga zahna an lantir a nih pawhin a mak hran lo ang.

Bayern Munich goalkeeper Manuel Neuer chuan, "Mats hian a hmalam hun a gaihtuah lai khan final kan khelh tur hi a ngaihtuah thleng ngei chuan ka ring. Player tawnhriat nei ṭha leh puitling a nih miau avangin eng ang boruak karah pawh
ṭha takin a khel thei ang tih ka ring a, Dortmund tana a match hnuhnung berah hian a club tan a theihna zawng zawng a hlan ngei ang," tiin ram tana a khelhpui
ṭhin chungchang a sawi.

Goal khung thiam

Bayern hian tlarhmaah Ro-bert Lewandowski an maltlat tir leh ngeiin a rinawm a, Poland international hian tun season Bundesliga match 29 inkhel bul a ṭan aṭangin goal 30 a khung a, Dortmund defender-te tan ven uluk ngai bik a ni.

Hetihlai hian Dortmund pawhin tunlai khawvela for-ward hriam ber pawl Pierre-Emerick Aubameyang an nei ve tho a, Real Madrid nen pawha an sawizawm leh tawh Aubameyang hian tun season-ah a club tan inelna hrang hrangah goal 39 zet a khung a, Bayern tlarhnung mut ti tui lo tam chu a tling ve chiang.