Gujarat Lions ngam lotu Kolkata

Ningani zan khan Indian Premier League-ah Gujarat Lions leh Kolkata Knight Riders an inhmachhawn a, Kanpur khawpuia inkhelah Gujarat-in wicket rukin hnehna an chang.

Kolkata an bat hmasa zawk a, over 20-ah run 124 siamin mi pariat an hloh. Knight Riders batsman zingah che ṭhaa sawi tur an awm lo a, run siam hnem ber Yusuf Pathan chuan run 36 a tlin hram.

Gujarat Lions bowler zingah Dwayne Smith a tal na a, West Indies all-rounder hian over li a vawmah run riat chiah pein wicket li lai a la a, KKR batsman-ten an ngam lo hle.

Lions tan an target run 125 siam tlin thil harsa a ni lo a, over 13.3-ah an target hi umphain mi pali chiah an hloh a, an chak chiang hle. Gujarat tan captain Suresh Raina-a'n innghahna tlak a nihzia lantirin ball 36 a hmachhawnah run 53 a siam a, a tawp thleng a dam a ni.

Vawiin IPL-ah inkhel pahnih a awm dawn a, tlai dar 4:00-ah Rising Pune Supergiants leh Kings XI Punjab inhmachhawnin zan dar 8:00-ah Gujarat Lions leh Mumbai Indians an inhmachhawn ve leh ang.