Novak Djokovic a inringtawk

Pathianni hian world number 1 Novak Djokovic chuan kum 29 a tling tawh dawn a, clay court Grand Slam awm chhun French Open a khel zui bawk ang.

Serbian thiampuipa hian French Open hi vawi 12 a khelhna tur a ni dawn a, Rafel Nadal-a lalna hmun a nih miau avangin a la champion ve lo. Nikum khan final lut mah se Stan Wawrinka lakah a chak lo thung.

French Open-ah hian player langsar tak tak an lo hlawhchham fo tawh a, Grand Slam vawi 14 champion thei Pete Sampras pawh kha ṭum 13 zet inlan mah se vawi khatmah final pawh a lut lo. Tuna Djokovic-a coach Boris Becker pawh vawi kua inlan mah se semifinal a kal pel lo.

Grand Slam vawi 11 champion tawh Djokovic chuan, "Monte Carlo-ah khel ṭha lo mah ila Madrid leh Rome-ah khan ṭha taka ka khelh chhuah leh theih tawh avangin inrintawkna ka nei sang a, tunah chuan tunhma lama ka la tih theih ngai loh hmachhawn turin ka inpeih tawh e," tiin a sawi.

Kuminah Djokovic hian match 40 a kheh tawh aṭangin vawi 37 hnehna a chang a, inena pangaah a champion tawh bawk.