Torres-a'n UCL a ngaipawimawh

Fernando Torres chuan Euro 2016 khel tura koh zingah tel lo mah se a buai loh thu leh a rilru zawng zawnga Champions League final a ngaihtuah tawh thu a sawi.

Spanish striker Torres hi 2014 World Cup hnua ram tana inkhel tura koh a ni tawh lo a, tun hnaiah a rawn khelh ṭhat chhoh leh avangin Vicente del Bosque-a'n Spain aiawh turin a ko leh mai tura ngaih a ni hman hial.

May 28-a an hmelma leh elpui Real Madrid nen an inkhelh tur thlirin Torres chuan, "Euro vangin ka rilru a buai lo, a chhan chu football ka khelh hun chhunga game pawimawh bera ngaih khelh hmabak ka neih vang a ni. Tu pawhin an tawn zen zen theih loh tawn theihna hun kan nei dawn a ni," tiin Champions League final a ngai pawimawh hle.

Kum 32-upa Torres chuan sawi chhunzawmin, "Final-a kan hmachhawn tur club hi tute nge an nih tih hi a pawimawh ber a ni lo a, Real nen hian inel em em mah ila tun ṭum hi chu Europe a nih avangin a boruak a dang daih," tiin La Liga lama an tluk loh chu a dah sang duh bik lo.