Celtic-ah Rodgers a chiang?

Scottish club Celtic leh Liverpool boss hlui Brendan Rodgers-te chu inrinni khan an indawr a, Irish manager hian Scottish Premier League club hi a enkawl ngei a rinawm ta hle.

Celtic neitu zinga share ngah ber Dermot Desmond chuan, "Rodgers hi manager ropui tak a ni a, chu chu Liverpool-ah kan hmu tawh. Mahse, amah chauh lo manager dang pawh kan dawr nual a, rei lo teah engkim a chiang ang," a ti.

Kum 43-a upa manager rual hian Wigan Athletic manager hlui Malky Mackay, Roy Keane, Aston Villa boss hlui Paul Lambert, Bolton Wanderers manager hlui Neil Lennon, West Brom boss hlui Steve Clarke, Everton lama kir leh tur anga sawi David Moyes-te hming pawh lamrik a ni.

Nikum October-a Liverpool-in Rodgers an ban hnuah Irish manager hian club enkawl nei loin a hun a hmang mek a, Swansea lamah kir leh tur angin sawi mah se Welsh club hian Francesco Guidolin chu contract thar an ziahpui avangin Rodgers hi a club hluiah a kir dawn lo tih a chiang tawh.

Zawhna awm erawh Rodgers hian Scottish club hi a pan duh kher ang em tih hi a ni. Reading pawh lo kaihruai tawhtu coach hi Liverpool chuan a contract tawp hmaa an ban avangin kum hnih chhung club dang a neih hma chuan pound maktaduai 5 an pe dawn a, Celtic a zawm chuan Rodgers hian he pawisa tam tham tak hi a dawng dawn lo tihna a ni.